Janubiy Koreyalik aktyor Li Jon Je “Kalmar o‘yini”dagi bosh qahramon obrazi orqali butun dunyoga mashhur bo‘ldi, ammo uning karyerasi faqatgina ushbu loyiha bilan cheklanmaydi. Li Jon Je yoshligidan ko‘plab boshqa film va seriallarda ishtirok etgan, ularning aksariyati o‘ziga xos syujet va murakkav voqealarga boy. Quyidagi ro‘yxatda 456-raqamli o‘yinchi ishtirokidagi eng sara film va seriallarni e’tiboringizga havola etamiz.
“Inchxon operatsiyasi” — 인천상륙작전 (2016)
Mazkur harbiy drama film Inchxon operatsiyasiga asoslangan, u Janubiy Koreyadagi urush davrida 1950-yilda BMT kuchlari tomonidan amalga oshirilgan muhim harbiy amaliyot bo‘lgan.
1950-yil yoz. Janubiy Koreyada davom etayotgan urush o‘zining cho‘qqisiga yetgan. 70 yoshli amerikalik general Duglas Makartur Pusanga keladi va BMTdan quruqlikdagi operatsiyalarni o‘tkazish vakolatini oladi. Makartur Janubiy Koreya va Amerika ishtirokidagi urushning syujetini o‘zgartirishga olib keladigan xavfli rejani ishlab chiqadi.
Film Koreyaning tarixiy ahamiyatga ega voqealarini yoritgani uchun katta muvaffaqiyatga erishgan.
“Xudolar bilan: ikki dunyo” — 신과함께: 죄와 벌 (2017)
“Xudolar bilan: ikki dunyo” filmda Li Jon Je yerosti dunyosining qiroli Yomra rolini ijro etgan. Syujetga ko‘ra, yong‘inda bolaning hayotini qutqarish uchun o‘z jonini fido qilgan qutqaruvchi Kim Ja Xon halok bo‘ladi. Uch nafar o‘lim farishtasi uning oldiga kelib, o‘limdan keyingi dunyosiga olib boradi. U yerda qahramonni yetti xudo tomonidan qilinadigan yeti xil sinov kutadi. Farishtalar uning himoyachilariga aylanadi. Agar Kim Ja Xon gunohlari kam va yaxshi odam deb topilsa, unga reinkarnatsiya — hayotga qaytish va qayta tug‘ilish imkoniyati beriladi.
“Prezident yordamchisi” — 보좌관 (serial, 2019)
Mazkur serial drama janrida bo‘lib, unda Koreyaning siyosiy hayoti va uning ichki qarama-qarshiliklari haqida hikoya qilinadi. Film syujeti haqiqiy siyosiy dunyodagi manipulyatsiyalar, korrupsiya, va qonunlarga amal qilish masalalariga asoslanadi. Serialda siyosatdagi ichki to‘qnashuvlar va murakkab munosabatlar, shuningdek, hokimiyatni saqlash uchun kurashish tasvirlanadi.
Ushbu dramada Li Jon Je ilgari politsiya detektivi bo‘lgan Chan Te Jun rolini ijro etadi. Qahramonning hokimiyatga bo‘lgan intilish uni yangi kasbni tanlashiga sabab bo‘ladi. Natijada u Janubiy Koreya Milliy Assembleyasi deputatining bosh maslahatchisi lavozimida ishlay boshlaydi.
“Ov” — 헌트 (2022)
1983-yil. Janubiy Koreya prezidentining Vashingtonga tashrifi chog‘ida sodir bo‘lgan, ammo muvaffaqiyatsiz o‘tgan suiqasddan so‘ng, ichki va tashqi razvedka xizmatlari rahbarlariga xodimlar orasidan josusni topish buyrug‘i beriladi. Koreyalik xoinni qidirish jarayonida ularning bari bir-biridan gumonsiray boshlaydi. Ushbu filmda Li Jon Je bosh rolni ijro etibgina qolmay, loyiha prodyuseri, ssenariy muallifi va rejissyor sifatida ham ishlagan.
“Akolit” (serial, 2024)
2024-yilda Disney+ striming platformasida premyerasi bo‘lib o‘tgan ilmiy-fantastik miniserial bo‘lib, “Yulduzlar jangi” franshizaning bir qismidir. Serial syujeti sirli qora kuchlarga qarshi kurash haqida hikoya qiladi.
Serialning dastlabki to‘rt qismi tomoshabinlar orasida turli xil fikr-mulohazalarga sabab bo‘lgan bo‘lsa-da, beshinchi qismdan boshlab ijobiy baholarni ola boshlagan. Unda Li Jon Je Jedi ustozi — Sol obrazini gavdalantirgan.
Izoh (0)