Netflix nihoyat platformaning butun tarixi davomidagi eng mashhur shou — “Kalmar o‘yini”ning uzoq kutilgan ikkinchi mavsumini taqdim etdi. Qiziqarli syujet, ramziy kiyimlar va yorqin dekoratsiya, shuningdek, yangi va sevimli qahramonlardan iborat aktyorlar tarkibi tufayli serial darhol AQSHda Netflix’ning kundalik “top-10 seriallar” reytingida birinchi o‘rinni egalladi.
Ikkinchi mavsumda Li Chon Je yana Son Ki Xun rolini ijro etadi. U avvalgi “Kalmar o‘yini”ning yagona g‘olibi bo‘lib, uni to‘xtatish uchun yana bir bor xavfli o‘yinda qatnashishga qaror qiladi.
2-qism: Helloun ziyofati
Aynan shu epizodda shimoliy koreyalik broker Shimoliy Koreya shevasi bilan gapiradi, biroq vatanida askar bo‘lgan va Shimoliy Koreyadan qochgan No Il (Pak Gyu Yong) bunday qilmaydi. (Birinchi mavsumda Se Byok ham akasi bilan suhbatlashishdan tashqari paytlarda Shimoliy Koreya shevasini ishlatmagan. Janubiy Koreyada yashovchi Shimoliy Koreyadan qochgan ko‘pchilik odamlar kamsitilishdan qochish uchun ongli ravishda shevasini yashirishga harakat qiladi).
3-qism: 001
044 raqamli o‘yinchi (Che Guk Xi) — shaman ayol Ki Xun uchun marosim o‘tkazishni taklif qiladi. Shamanizm Koreyada qadimdan mavjud bo‘lgan an’ana bo‘lib, bugungi kunda ozchilik unga amal qilsa-da, ko‘plab koreyslar shamanlarni bashoratchi sifatida qabul qilishadi. Ularga sog‘lig‘idagi muammolari yoki shaxsiy va kasbiy masalalar bo‘yicha murojaat qilishlari mumkin. Shaman ayollar ruhlar bilan muloqot qilish uchun marosim o‘tkazib, ulardan yordam so‘rashadi.
Myon Gi kabi personajning serialda ishtirok etishi mantiqan to‘g‘ri, chunki kriptovalyuta hiylalari Janubiy Koreyada katta muammo bo‘lib, ularning ba’zilari ushbu sxemalarni targ‘ib qilishga yordam bergan mashhur youtuberlar bilan bog‘liq. Birgina o‘tgan oyda Janubiy Koreya politsiyasi mamlakat tarixidagi eng yirik kriptovalyuta firibgarligiga aloqador 215 kishini hibsga olgan.
Tanos (siyohrang sochli sobiq repper)ni bejizga T.O.P. o‘ynamagan, chunki uning qahramoni bilan umumiy jihatlari bor. T.O.P (haqiqiy ismi Chxve Sin Xyon) — afsonaviy K-pop guruhi BIGBANGning sobiq a’zosi va reperi. 2017-yilda u ko‘p marotaba marixuana chekkani uchun 10 oylik shartli qamoq jazosiga, ikki yillik sinov muddatiga hukm qilinadi. Jamoatchilik tomonidan qoralanganligi sababli u shou-biznes sohasidagi faoliyatini yakunlaganini e’lon qildi, ammo keyinchalik “Kalmar o‘yini”ning ikkinchi mavsumida paydo bo‘lib, qarorini o‘zgartirdi. Uning ishtiroki Janubiy Koreyada ko‘plab bahs-munozaralarga sabab bo‘ldi.
4-qism: Olti oyoq
O‘yinchilar “Olti oyoqli pentatlon”da ishtirok etish uchun katta zalga kirganda, kirish qismida uchta so‘zdan iborat yozuvni ko‘rish mumkin: 힘차게 씩씩하게 굳세게 — buni “kuchli, g‘ayratli, qattiq” deb tarjima qilish mumkin. Bunday so‘zlar tarixan koreys maktablarida sport musobaqalarida yoki jismoniy tarbiya darslarida bolalarni rag‘batlantirish uchun ishlatilgan.
O‘tmishda ddakji o‘yini odatda o‘g‘il bolalar bilan bog‘liq bo‘lib, gonggi (공기) esa qizlar o‘yini hisoblangan. Aynan shuning uchun ham De Xo (Kan Xa Nil) gonggi o‘ynashni bilishini, Jun Xi (Cho Yuri) esa ilgari hech qachon bu o‘yinni o‘ynamaganini, lekin ddakjini yaxshi eplay olishini aytishi qiziq.
Ikki qo‘riqchi No Ilga tahdid qilgan sahnada ular 남남북녀 iborasini aytishadi, bu so‘zma-so‘z “janublik erkak - shimollik ayol” deb tarjima qilinadi. Bu Koreya bo‘linishidan oldin paydo bo‘lgan qadimiy ibora bo‘lib, odatda Koreya yarimorolining janubiy qismidagi erkaklar an’anaviy ravishda kelishgan va muvaffaqiyatli, shimoldagi ayollar esa tabiiy go‘zal deb hisoblanishini anglatadi.
Bundan tashqari, Janubiy Koreyaga kelib o‘rnashib qolgan shimoliy koreyalik qochoqlarning aksariyati ayollar bo‘lganligi sababli janubiy koreyalik erkaklar bilan shimoliy koreyalik ayollar o‘rtasida sovchilik qilishga ixtisoslashgan ko‘plab agentliklar mavjud. Masalan, nikoh vositachisi ofisidagi viveskaga “Janubiy koreyalik erkak va shimoliy koreyalik ayol o‘rtasidagi nikoh” deb yozilgan.
So‘nggi “Aralash” o‘yini paytida yangragan “둥글게 둥글게” qo‘shig‘i koreyalik bolalarining klassik qo‘shig‘idir.
Izoh (0)