“Kalmar o‘yini” filmining kkinchi mavsumida birinchisiga qaraganda o‘yinlar kamroq bo‘ldi. Dastlab ishtirokchilar o‘sha “Sekinroq yursang, uzoqqa borasan” o‘yinini, shuningdek, o‘yinchilar ommaviy vahima bilan xonalarga yashirinishlari kerak bo‘lgan “Uchinchisi ortiqcha” o‘yinini o‘ynashadi.
Ayniqsa, to‘rtinchi va beshinchi qismlardagi “Olti oyoqli pentatlon” yoki “Olti oyoqli beshkurash” eng qiyin sinov bo‘ladi. Musobaqa beshta mini-o‘yindan iborat bo‘lib, unda qahramonlar besh kishilik jamoa bo‘lib o‘ynaydi. Shu bilan birga, ularning oyoqlari bog‘lanadi — guruhning “tayanchi” oltita oyoq bo‘lgani uchun o‘yin shunday nomlanadi.
1. “Ttakchi” mini o‘yini
Ushbu o‘yin serial boshida ko‘rsatilgan, ya’ni ishtirokchilarni o‘yinga taklif qilgan shaxs aynan shu o‘yinni o‘ynagan. Qoidalar xuddi 90-yillarda mashhur bo‘lgan “yuztalik” o‘yinidagidek, lekin bu safar fishkalar yoki kepslar o‘rniga buklangan ikkita konvertdan foydalaniladi — serialda ular qizil va ko‘k rangda. Birinchi o‘yinchi konvertini yerga qo‘yadi, ikkinchi ishtirokchi o‘zining konverti bilan urib, uni ag‘darishga harakat qiladi. Agar buning uddasidan chiqsa — g‘alaba, ag‘darolmasa — yurish raqibga o‘tadi.
“Olti oyoqli pentatlon”da qoidalar soddalashtiriladi. O‘yinda bitta odam ishtirok etadi: u o‘z konvertini ikkinchisini teskari qilmaguncha uradi. Asosiy raqib esa vaqt.
2. “Bisokchigi” mini o‘yini
Bu o‘yinning qoidalari milliy o‘yinlarimizdan biri chillakka o‘xshab ketadi, lekin ancha soddaroq. Yerga shakli qabrtoshga o‘xshash tosh qo‘yiladi. O‘yinchi belgilangan masofadan boshqa yassi toshni otib, uni urib yiqitishi kerak. Yagona shart — chiziqdan o‘tmaslik, aks holda zarba hisobga olinmaydi.
“Kalmar o‘yini” doirasidagi ushbu musobaqaning yagona qiyinchiligi shundaki, ishtirokchilarning oyoqlari bir-biriga bog‘langan. Agar xato qilishsa, o‘yinchilarning beshalasi birgalikda tashlangan toshgacha borishlari, uni olishlari va yana ortga qaytishlari kerak — bu ancha vaqt talab etadi.
3. “Konginori” mini o‘yini
Bu “Olti oyoqli pentatlon”dagi eng qiyin o‘yin bo‘lib ko‘rinishi mumkin ammo uning qoidalarini tushunish oson. Harakatlarni bajarish esa qiyin — yaxshi rivojlangan qo‘l motorikasi va mukammal koordinatsiya kerak. O‘zimizning beshtosh o‘yiniga o‘xshaydi. O‘yin quyidagi beshta bosqichdan iborat.
- O‘yinchi beshta toshchaning hammasini o‘yin maydoniga tashlaydi. Keyin maydondan bittasini olib, irg‘itadi. Uni otganda o‘sha qo‘li bilan ikkinchisini olib, birinchisini tutib oladi. Yana bittasini tashlab, uchinchisini oladi-da, tutib oladi. Bunda o‘yinchi beshta toshchaning barchasini tutmaguncha davom etadi.
- O‘yinchi barcha toshlarni maydonga qo‘yadi, xuddi shu tarzda bittasini yuqoriga tashlaydi, lekin birdaniga ikkitasini oladi. Keyin yana bittasini tashlab, qolgan ikkitasini oladi-da, otganini ilib oladi.
- Barcha toshlar yana o‘yin maydoniga tashlanadi. O‘yinchi bitta toshni tashlaydi, lekin birdaniga uchtasini oladi. Keyin yana bittasini tashlab, oxirgisini oladi.
- Keyin o‘yinchi toshni yana tashlaydi va to‘rttasini maydonga qo‘yadi, musht bilan siqilib, birinchisini ushlaydi. Uni yana tashlaydi, maydondan to‘rttasini to‘playdi va yana birinchisini ushlaydi.
- Shundan so‘ng ishtirokchi mushtumida yashiringan beshta toshchaning barchasini birvarakayiga tashlab, kaftining orqa tomoni bilan ilib olishi kerak. Keyin yana bir marta uloqtirib, beshtasini tutib olishi kerak.
4. “Pxengi” mini o‘yini
Bu o‘yinda ishtirokchiga maxsus spinner va kichikroq arqon beriladi. U arqonni spinner uchiga bog‘lab, uni oldinga uloqtiradi. Ishtirokchining maqsadi — ipni shunday qattiq tortish kerakki, spinner aylana boshlashi va yiqilmasligi kerak.
Tanlovning murakkabligi shundaki, agar u birinchi martada bajara olmasa, takrorlash ko‘p vaqt oladi. Spinner uzoqqa uchib ketishi, uni topib, yana arqonga o‘rash kerak. O‘zimizning bizbizak o‘yinining aynan o‘zginasi.
5. “Chegichagi” mini o‘yini
Oxirgi o‘yin lanka tepishga o‘xshaydi. Faqatgina farq chegi — hayvon yungidan emas, qopqoq va yaltiroq qog‘oz yoki plyonkadan iborat bo‘ladi.
O‘yinchi chegini yerga tushirmasdan ketma-ket besh marta tepishi kerak. Agar tushirib yuborsa, hisoblash qaytadan boshlanadi.
Izoh (0)