Xiaomi kompaniyasi 16 litr hajmli Mijia Smart Gas Water Heater Pro Soft Water Dual-Core aqlli gazli suv isitgichini taqdim etdi. NotebookCheck nashrining xabar berishicha, isitgich Xitoyda 5999 yuanga (taxminan 10,3 million so‘m) sotuvga chiqarilgan.
Modelning asosiy xususiyati o‘rnatilgan suvni yumshatish tizimi hisoblanadi. Korpusda tuzlar uchun konteyner mavjud bo‘lib, ular orqali suv ion almashinuvchi qatron yordamida filtrlash jarayonidan o‘tadi. Ishlab chiqaruvchining ta’kidlashicha, bu usul 99,9% gacha kalsiy va magniy ionlarini yo‘qotish imkonini beradi, to‘rt bosqichli tozalash tizimi esa qo‘shimcha ravishda 99,9% gacha bakteriyalarni yo‘q qiladi.
Suv isitgich barqaror haroratni saqlab turish uchun ikki tomonlama aylanish texnologiyasi va binolarning yuqori qavatlariga issiq suv yetkazib berishni tezlashtiruvchi TSI boost nasosi bilan jihozlangan. Qurilma oshxona, hammom va kir yuvish xonalarida foydalanish uchun mo‘ljallangan.
Model HyperOS Connect ekotizimiga integratsiyalashgan va aqlli uy ssenariylarini qo‘llab-quvvatlaydi. Masalan, aqlli eshik qulfi ochilganda tizim avtomatik ravishda isitishni yoqishi mumkin. Boshqaruv mobil ilova, 2,4 GGs Wi-Fi, Bluetooth 5.0 va Xiao AI ovozli yordamchisi orqali amalga oshiriladi.
Xavfsizlikni ta’minlash uchun suv sizib chiqishini aniqlash datchiklari, qizib ketish va muzlashdan himoya tizimlari o‘rnatilgan. Ilova, shuningdek, foydalanuvchilarga yumshatuvchi tuzlarni almashtirish zarurligi haqida eslatma yuboradi.
Xiaomi kompaniyasining ushbu modelni Xitoydan tashqarida ishlab chiqarish rejalari haqida ma’lumot yo‘q.
Bundan avval Xiaomi 23 000 Paskal so‘rish kuchiga ega bo‘lgan yangi Mijia Robot Vacuum Mop 5 Pro robot-changyutgichini taqdim etgandi. Qurilma ikkita robotsimon cho‘tka bilan jihozlangan bo‘lib, ular polni bir vaqtda ham supurish, ham yuvish vazifasini bajaradi.
Shuningdek, kompaniya bosh suyagi orqali tovush uzatadigan Bone Conduction Earphones’ning ikkinchi avlodini ham taqdim etgandi.
Izoh (0)