Amerikaning Netflix striming xizmati tomondan taqdim etilgan “Kalmar o‘yini” serialining rejissyori Xvan Don Xyok BBCga bergan intervyusida suratga olish ishlarida duch kelgan qiyinchiliklari haqida so‘zlab berdi.
Loyihaga tayyorgarlik ko‘rish va suratga olish ishlaridagi stress tufayli rejissyor sakkiz yoki to‘qqizta tishini yo‘qotganini aytdi. Bundan avval, 2021-yilda Xvan Don Xyok loyihaning birinchi mavsumi tufayli sog‘lig‘ida jiddiy muammolar paydo bo‘lgani haqida ma’lum qilgan edi, o‘sha vaqtda u oltita tishidan ayrilgan edi.
Rejissyorning qo‘shimcha qilishicha, avvaliga u suratga olish paytida boshdan kechirgan katta stress tufayli serial davomini suratga olmaslikka qaror qilgan. Ammo moddiy rag‘bat olish uchun motivatsiya uning fikrini o‘zgartirgan. Chunki serial g‘oyasi uzoq yillar davomida hech qaysi kino studiyalarga yoqmagan, faqatgina Netflix kompaniyasi uni ekranga chiqarishga rozi bo‘lgan.
Biroq shartnoma shartlariga ko‘ra, Netflix tomonidan chiqarilgan film yaxshi natijaga erishgan taqdirda daromadni bo‘lishmaydi va faqatgina hujjatda belgilangan miqdordagi mablag‘ni beradi. Shu sababli “Kalmar o‘yini” deyarli bir milliard dollar daromad keltirganiga qaramay, Xvang Don Xyokka undan hech narsa nasib qilmagan.
“Garchi birinchi mavsum butun dunyo bo‘ylab juda katta muvaffaqiyatga erishgan bo‘lsa-da, rostini aytsam, men juda kam pul ishladim. Shu sababli ikkinchi mavsum ustida ishlash birinchisining muvaffaqiyatini qoplashga yordam beradi”, deydi rejissyor.
Xvan Don Xyokning so‘zlariga ko‘ra, hozirgi loyihada u avvalgidan ko‘ra ko‘proq stressni boshdan kechirmoqda. Chunki ikkinchi mavsumdagi barcha ishlar noldan va yangi aktyorlar bilan boshlangan. Qolaversa, tomoshabinlarning “Kalmar o‘yini 2” dan umidi katta.
Joriy yil 26-dekabrda “Kalmar o‘yini” ning ikkinchi mavsumi premyerasi bo‘lib o‘tadi. Voqealar birinchi mavsum tugaganidan uch yil o‘tgach sodir bo‘ladi. Bosh qahramon, avvalgi o‘yinda g‘alaba qozongan 456-raqamli ishtirokchi ko‘plab halokatlarga olib keluvchi dahshatli o‘yinga butunlay chek qo‘yish maqsadida musobaqa tashkilotchilarini izlashga tushadi va o‘yinga qaytadi.
Izoh (0)