“Kalmar o‘yini” serialining ikkinchi mavsumi premyerasidan so‘ng 11 kun ichida 126,2 milliondan ortiq marta tomosha qilindi. Qisqa muddatda bunday yuqori natijaga hali hech qaysi Netflix seriali erisha olmagan.
Shouning davomi Netflix’ning eng mashhur ingliz tilida bo‘lmagan seriallari reytingida ikkinchi o‘rinni egallagan. Mazkur reytingda faqatgina “Kalmar o‘yini” ning birinchi mavsumi yetakchilik qilmoqda. Mazkur serial ilk bor chiqqandan keyin 91 kun ichida 265 million marta tomosha qilingan. Taxminlarga ko‘ra, ikkinchi mavsum ushbu rekordni yangilab, birinchisini ortda qoldirishi mumkin.
Netflix onlayn kinoteatrining eng ko‘p tomosha qilingan seriallari umumiy ro‘yxatida (bu yerda ingliz tilidagi loyihalar ham inobatga olingan) “Kalmar o‘yini”ning ikkinchi mavsumi to‘rtinchi o‘rinni egallagan. Uchinchi o‘rinni serialning birinchi mavsumi, ikkinchi o‘rinni “Uenzday”, yetakchilikni esa “Ajabtovur ishlar”ning to‘rtinchi mavsumi olgan.
Janubiy Koreyada suratga olingan mazkur serialning ikkinchi mavsumi 2024-yil 26 dekabr kuni Netflix’da taqdim etildi. Shou Rotten Tomatoes platformasida tanqidchilar tomonidan 83%, tomoshabinlar tomonidan esa 63% ijobiy baholandi. 8-yanvar kuni Netflix uchinchi mavsumga oid birinchi premyerani namoyish qildi:
Uchinchi mavsum serial uchun oxirgisi bo‘ladi. Premyera 2025-yilda bo‘lib o‘tadi.
Izoh (0)