“Kalmar o‘yini”: serial ijodkorlari ikkinchi mavsumda javobsiz qoldirgan 8 ta savol

“Kalmar o‘yini”ning ikkinchi mavsumidan keyin tomoshabinlarda juda ko‘p savollar tug‘ilmoqda. Ulardan eng qiziqarlilarini e’tiboringizga havola qilamiz.

Qo‘zg‘olon bostirilgandan so‘ng o‘yin davom etadimi?

Birinchi mavsumdan farqli o‘laroq, ikkinchi mavsumda o‘yinni oxirigacha ko‘rolmaymiz — uchinchi bosqichdan keyin Ki Xun bir nechta tarafdorlarini qo‘riqchilarga hujum qilishga va yuqori qavatga chiqish uchun tashabbusni qo‘lga olishga undaydi. Bu isyonda uncha ko‘p odam ishtirok etmaydi, tirik qolgan o‘yinchilarning aksariyati katta zalda qoladi — binoda tartib o‘rnatilgach, ular o‘yinni davom ettirishi mumkin. Natijada qo‘zg‘olonda halok bo‘lganlar shunchaki hisobga pul qo‘shadi. Qizig‘i shundaki, ikkinchi mavsumda bir vaqtning o‘zida bir nechta o‘yinchining g‘alaba qozonish imkoniyati haqida aytiladi — balki o‘yinni chindan ham to‘xtatishar yoki musobaqalar davom etarmikan?

388-raqamli o‘yinchida qanday sir bor?

Ikkinchi mavsumga ko‘plab yangi qahramonlar qo‘shildi, ammo ular orasida haqiqatan ham qiziqarli bo‘lganlari o‘ntadan oshmaydi. Ishtirokchilar orasida 388-raqamli o‘yinchi Kan De Xo alohida ajralib turadi, u nimanidir yashirayotganga o‘xshaydi. Dastlab u o‘zini sobiq harbiy deb tanishtiradi, so‘zining isboti sifatida dengiz piyodasi tatuirovkasini ko‘rsatib, 390-raqamli o‘yinchi Ki Xunning eski do‘sti Pak Chon Beni ishontiradi. Biroq asta-sekin De Xoning yolg‘on gapirgani ma’lum bo‘ladi — u qurol ishlata olmaydi, jang maydonida qo‘rqoqlik qiladi, finalda o‘rtoqlariga xiyonat qiladi. Uchinchi mavsumda bu qahramonning aslida kimligini bilish vaqti keladi.

Shaman ayolning qarg‘ishi amalga oshadimi?

Yana bir qiziqarli yangi qahramon — 04 raqamli o‘yinchi Son Ne, o‘zini shaman deb ataydi, doimiy ravishda osmon va yer xudolaridan yordam so‘raydi. Ko‘rinishidan, u juda shafqatsiz va xudbin ayol. Ayol o‘zini har qanday falokatlardan himoyalangan deb hisoblaydi, lekin boshqalarni osongina la’natlaydi va boshqa o‘yinchilarga azobda o‘lishni bashorat qiladi. Kino ijodkorlari bu o‘yinchini shunchaki qo‘shishmagan — shaman ayol hali o‘zini ko‘rsatishi kerak. Eng xavotirli tomoni shundaki, Son Ne o‘yinchilar orasidan o‘ziga ishonganlarini osonlikcha topadi — uning kichik to‘dasi armiyaga aylanishi mumkin.

Kapitan Pak kimga ishlaydi?

Birinchi mavsumda Xvan Chun Xo oroldagi otishmadan keyin tirik qoladi — uni Pak ismli baliqchilik kemasining kapitani qutqaradi. Politsiyachi orolni topish niyatidan voz kechmaydi, bunda unga kapitan Pak yordam beradi, ammo finalda dengizchini qandaydir tashqi kuchlar boshqarayotganini ko‘ramiz — u qidiruv guruhining dronini ishdan chiqaradi va bunga tasodifan guvoh bo‘lgan guruh a’zosini dengizga tashlab yuboradi. Ehtimol, kapitan sobiq boshlovchi, hozirda 001 raqamli o‘yinchi bo‘lgan Xvan In Xoga ishlar. Chun Xo In Xoning ukasi bo‘lib, In Xo kapitandan uni o‘yindan uzoqroq tutishni so‘ragan bo‘lishi mumkin. 

Kan No Il qanday o‘yin o‘ynayapti?

Ikkinchi mavsumning eng qiziqarli syujet chiziqlaridan biri — Shimoliy Koreyadan qochib kelgan Kan No Ilning o‘yindagi qo‘riqchilarga qo‘shilishi. Yosh ayolni faqat pul qiziqtiradi — u bir paytlar tortib olingan farzandini izlayapti, biroq shu bilan birga u o‘yinda ham buzg‘unchilik qilib, murdalarning o‘g‘irlanishiga to‘sqinlik qilmoqda. No Il 246-raqamli o‘yinchi Ken Sokni asrab qolishga urinyapti, ammo u tez orada halok bo‘ladi. Bu o‘lim shimoliy koreyalik merganning xatti-harakatini o‘zgartiradimi? U Ki Xun boshchiligidagi qarshilik harakatining bir qismiga aylanadimi? Oxir-oqibat farzandini topa oladimi? Shuncha qotillik sodir etganidan keyin kechirilarmikan?

Ki Xunning qizini yana ko‘ramizmi?

Birinchi mavsumda serialning ko‘plab sahnalari Ki Xunning kichik qiziga bag‘ishlangan edi — aslida aynan qizi uchun erkak xavfli o‘yinga qo‘shiladi. Yangi qismda qiz deyarli tilga olinmaydi — qahramon o‘zini o‘yin tashkilotchilarini izlashga bag‘ishlagan. Ikkinchi mavsum davomida Ki Xun unga faqat bir marta qo‘ng‘iroq qiladi, lekin gapirishga jur’at etolmaydi. Biroq qizi uning uchun hali ham qadrli, ehtimol, qizcha serialning uchinchi mavsumida muhim rol o‘ynar.

O‘yin tashkilotchilari qanchalik qudratli?

Albatta, uchinchi mavsum finalida yaxshi xotimaga umid qilamiz, ammo ochig‘ini aytganda, Ki Xun va o‘yin tashkilotchilari o‘rtasidagi kuchlar teng emas. O‘yin ortida turgan hamjamiyat yetarlicha kuchli va uyushgan bo‘lib, g‘oliblarni teri ostiga joylashtirilgan chip orqali kuzatadi — ular kapitan Pakni sotib oladi, o‘ldirilganlarning organlarini hech qanday xavf-xatarsiz sotishga majbur qiladi. Chun Xoni yashirgan, keyin ishdan bo‘shatgan politsiya boshlig‘i ham maxfiy kompaniyada ishlayotganiga shubha bor. Bir kishi bu tizimni barbod qila oladimi? Boshqa film va seriallarda ham shunday bo‘lgan, lekin o‘yin tashkilotchilari birgina Ki Xun uchun juda kuchli emasmikan?

Ikkinchi mavsum titrlaridan keyingi kadrda nima sodir bo‘ladi?

Titrlardan keyingi qisqa kadrda mualliflar voqea nima bilan davom etishiga kichik ishora beradi — bu epizodda bir nechta o‘yinchilar “Sekinroq yursang, davom etasan” o‘yini maydoniga juda o‘xshash joyga chiqadilar. Darvoqe, bu yerda harakat datchigi bilan qoidabuzarlarni kuzatadigan bitta qo‘g‘irchoq yonida ikkinchisi ham bor. Bu o‘yinning keyingi bosqichiga ishora bo‘ladimi yoki yo‘qmi, noma’lum. Ehtimol, bu isyondan keyingi o‘yinning qo‘shimcha datchik bilan kuchaytirilgan davomidir. Uchinchi mavsumni kutamiz...

Bunda hammani faqat bir narsa quvontiradi — uchinchi mavsum, aftidan, allaqachon tayyor, uning premyerasi yozda bo‘lishi kutilmoqda. Shunda barcha savollarga javob beriladi. Nima bo‘lganda ham “Kalmar o‘yini” mualliflari ommani yana o‘ziga jalb qilishning uddasidan chiqdi, ular tomoshabinlarni bolalarning g‘alati o‘yinlari haqida gapirishga, faqat raqamlariga ko‘ra farq qiladigan odamlar uchun qayg‘urishga majbur qilish yo‘lini topishdi. Bu har qanday maqtovga arziydigan katta yutuq.