Netflix tizimi joriy yilda premyerasi bo‘lib o‘tishi rejalashtirilgan “Kalmar o‘yini” serialining ikkinchi mavsumini faol ravishda targ‘ib qilishda davom etmoqda. Kuni kecha serialning keyingi qismdagi voqealarni aks ettiruvchi yangi tizer e’lon qilindi.
Tizer original tarzda ishlab chiqilgan, unda go‘yoki tomoshabinga qiziqa o‘yinda qatnashish taklifi beriladi. Videoda tomoshabinlarga birinchi mavsumdan tanish bo‘lgan sirli odam qanday qilib yana ishga tayyorgarlik ko‘rayotgani, turli odamlarga qizil yoki ko‘k konvertlarni taklif qilib, xavfli o‘yinga chorlayotgani aks etgan.
Ikkinchi mavsumda bosh qahramon Son Ki Xun o‘yinda g‘alaba qozonganidan uch yil o‘tgandan so‘ng sodir bo‘lgan voqealar tasvirlanadi. U ko‘plab halokatlarga olib keluvchi dahshatli o‘yinga butunlay chek qo‘yish maqsadida musobaqa tashkilotchilarini izlashga tushadi. Uning harakatlari nihoyat o‘z samarasini berganida mudhish o‘yinni tugatish uchun Son Ki Xun yana Kalmar o‘yinida ishtirok etishi shart ekanligi ma’lum bo‘ladi.
Loyihaning ikkinchi mavsumida “Emmi” mukofoti sovrindori Li Jong Jedan tashqari, Li Ben Xon, Vi Xajun, Kon Yu, Im Si Van, Kan Xanil, Park Sonxun, Yan Don Gin va boshqa aktyorlar suratga tushadi. Serialning uchinchi mavsumi uchun rejalar tayyor bo‘lib, u yakuniy bo‘ladi. Uzoq kutilgan serial davomining barcha epizodlari yil oxirida — 26 dekabrda namoyish etiladi.
Avvalroq hindistonlik rejissyor Soham Shoh Netflix striming xizmatini “Kalmar o‘yini” serialini plagiatda ayblagan edi.
Izoh (0)