Amerika Qo‘shma Shtatlari prezidenti Donald Trampning eng katta yutug‘i Ukrainada tinchlik o‘rnatish bo‘lishi mumkin edi. Biroq Tramp buning uchun boshqa davlatlarda muvaffaqiyatli qo‘llagan bosim o‘tkazish strategiyasini ishga solishi lozim. Bu haqda The Wall Street Journal yozdi.
Manbaga ko‘ra, Donald Tramp Jo Baydenni Ukrainaga faqat himoyalanishga ruxsat berganlikda aybladi. U “faqat himoya bilan g‘alabaga erishib bo‘lmasligini” ta’kidladi. Bu bayonot orqali Tramp AQSHning uzoq masofali raketalaridan Rossiya ichkarisidagi nishonlarga zarba berishga ruxsat etilishini nazarda tutgandek tuyildi. Bu esa Rossiya prezidenti Vladimir Putinga bosim o‘tkazib, uni muzokara stoliga majbur qilishi mumkin edi.
Keyinchalik ma’lum bo‘ldiki, AQSH Mudofaa vazirligi Ukrainaga aynan shunday uzoq masofaga uchuvchi qurollardan foydalanishni taqiqlagan.
“Bunday taqiq Pentagonning strategik bo‘limi rahbari Elbridj Kolbining so‘nggi “shoh asari” bo‘lsa kerak. Savol tug‘iladi: AQSHning Ukraina bo‘yicha siyosatida kim asosiy rolni o‘ynayapti? Trampmi yoki vitse-prezident Jey Di Vensning Pentagonidagi odamimi?”, deya yozadi nashr.
Alyaskadagi sammit hech qanday natija bermadi. Bu faqat Vladimir Putinga sanksiyalardan qochish imkonini berdi. Tramp nima qilishni o‘ylash uchun ikki hafta kerakligini aytdi. U mas’uliyatni har ikki tomonga ham yuklamoqda. Biroq Putinning maqsadi — Ukrainani davlat sifatida yo‘q qilish. Shuning uchun urushni yer almashish orqali hal qilib bo‘lmaydi.
Trampning Putinni tinchlikka ko‘ndirish urinishlari muvaffaqiyatsiz tugadi. Endi AQSH prezidenti boshqa davlatlarda juda samarali qo‘llagan bosim o‘tkazish strategiyasiga o‘tishi lozim.
“Tramp saylovchilarga qo‘lidan kelgancha Putinni tinchlikka majburlashga harakat qilganini ochiq ayta oladi. Biroq bu urinish muvaffaqiyatsiz tugadi. Keyingi strategiya esa Tramp boshqa mintaqalarda samarali qo‘llagan maksimal bosim siyosatidir. Tramp urushga barham berish uchun Putinga davom ettirish narxi juda yuqori ekanini tushuntirishi lozim”, deya xulosa qiladi WSJ.
New York Post nashrining yozishicha, Vladimir Putin muzokaralardan voz kechish “san’ati” bilan nafaqat Vladimir Zelenskiyni, balki Donald Trampni ham “troll” qilmoqda. Tahlilchilarga ko‘ra, Donald Tramp kuch ishlatishga o‘tsa, Putin Alyaskadagi tinchlik signallarini o‘zining sharmandaligiga aylantirib qo‘yishi mumkin.
Avvalroq Donald Tramp urush uchun Ukrainaga pul bermasligini ma’lum qilgan edi. Amerika Ukrainaga beradigan qurollar uchun NATO davlatlari pul to‘laydi. Shuningdek, u Ukrainadagi mojaroni to‘xtatish eng osoni bo‘ladi, deb xato o‘ylaganini tan olgan. Biroq baribir urush tartibga solinishiga ishonch bildirishini aytgan.
Izoh (0)