Netflix film va teleseriallar striming xizmati “Kalmar o‘yini” serialining ikkinchi mavsumi uchun tizerni e’lon qildi. Uning premyerasi joriy yilning 26-dekabrida bo‘lib o‘tishi rejalashtirilgan.
Ikkinchi mavsumda bosh qahramon Son Ki Xun o‘yinda g‘alaba qozonganidan uch yil o‘tgandan so‘ng sodir bo‘lgan voqealar tasvirlanadi. U ko‘plab halokatlarga olib keluvchi dahshatli o‘yinga butunlay chek qo‘yish maqsadida musobaqa tashkilotchilarini izlashga tushadi. Uning harakatlari nihoyat o‘z samarasini berganida mudhish o‘yinni tugatish uchun Son Ki Xun yana Kalmar o‘yinida ishtirok etishi shart ekanligi ma’lum bo‘ladi.
Loyihaning ikkinchi mavsumida “Emmi” mukofoti sovrindori Li Jong Jedan tashqari, Li Ben Xon, Vi Xajun, Kon Yu, Im Si Van, Kan Xanil, Park Sonxun, Yan Don Gin va boshqa aktyorlar suratga tushadi. Serialning uchinchi mavsumi uchun rejalar tayyor bo‘lib, u yakuniy bo‘ladi va 2025-yilda namoyish etiladi.
“Kalmar o‘yini” premyerasi 2021-yilning sentyabr oyida namoyish etildi va Netflix tarixidagi eng ko‘p tomosha qilingan serialga aylandi. Loyiha debyutidan so‘ng bir oy o‘tib, stiriming xizmatida 1,65 milliard soat tomosha qilingan serial bo‘ldi.
Bundan tashqari, serialdan ilhomlangan Netflix kompaniyasi 2023-yil noyabr oyida “Kalmar o‘yini” realiti-shousining birinchi seriyasini chiqardi. Unda 456 nafar ishtirokchi 4,56 million AQSH dollari mukofoti uchun kurash olib bordi.
Izoh (0)