Жанубий Кореялик актёр Ли Жон Же “Калмар ўйини”даги бош қаҳрамон образи орқали бутун дунёга машҳур бўлди, аммо унинг карьераси фақатгина ушбу лойиҳа билан чекланмайди. Ли Жон Же ёшлигидан кўплаб бошқа фильм ва сериалларда иштирок этган, уларнинг аксарияти ўзига хос сюжет ва мураккав воқеаларга бой. Қуйидаги рўйхатда 456-рақамли ўйинчи иштирокидаги энг сара фильм ва сериалларни эътиборингизга ҳавола этамиз.
“Инчхон операцияси” — 인천상륙작전 (2016)
Мазкур ҳарбий драма фильм Инчхон операциясига асосланган, у Жанубий Кореядаги уруш даврида 1950 йилда БМТ кучлари томонидан амалга оширилган муҳим ҳарбий амалиёт бўлган.
1950 йил ёз. Жанубий Кореяда давом этаётган уруш ўзининг чўққисига етган. 70 ёшли америкалик генерал Дуглас Макартур Пусанга келади ва БМТдан қуруқликдаги операцияларни ўтказиш ваколатини олади. Макартур Жанубий Корея ва Америка иштирокидаги урушнинг сюжетини ўзгартиришга олиб келадиган хавфли режани ишлаб чиқади.
Фильм Кореянинг тарихий аҳамиятга эга воқеаларини ёритгани учун катта муваффақиятга эришган.
“Худолар билан: икки дунё” — 신과함께: 죄와 벌 (2017)
“Худолар билан: икки дунё” фильмда Ли Жон Же ерости дунёсининг қироли Ёмра ролини ижро этган. Сюжетга кўра, ёнғинда боланинг ҳаётини қутқариш учун ўз жонини фидо қилган қутқарувчи Ким Жа Хон ҳалок бўлади. Уч нафар ўлим фариштаси унинг олдига келиб, ўлимдан кейинги дунёсига олиб боради. У ерда қаҳрамонни етти худо томонидан қилинадиган ети хил синов кутади. Фаришталар унинг ҳимоячиларига айланади. Агар Ким Жа Хон гуноҳлари кам ва яхши одам деб топилса, унга реинкарнация — ҳаётга қайтиш ва қайта туғилиш имконияти берилади.
“Президент ёрдамчиси” — 보좌관 (сериал, 2019)
Мазкур сериал драма жанрида бўлиб, унда Кореянинг сиёсий ҳаёти ва унинг ички қарама-қаршиликлари ҳақида ҳикоя қилинади. Фильм сюжети ҳақиқий сиёсий дунёдаги манипуляциялар, коррупция, ва қонунларга амал қилиш масалаларига асосланади. Сериалда сиёсатдаги ички тўқнашувлар ва мураккаб муносабатлар, шунингдек, ҳокимиятни сақлаш учун курашиш тасвирланади.
Ушбу драмада Ли Жон Же илгари полиция детективи бўлган Чан Те Жун ролини ижро этади. Қаҳрамоннинг ҳокимиятга бўлган интилиш уни янги касбни танлашига сабаб бўлади. Натижада у Жанубий Корея Миллий Ассемблеяси депутатининг бош маслаҳатчиси лавозимида ишлай бошлайди.
“Ов” — 헌트 (2022)
1983 йил. Жанубий Корея президентининг Вашингтонга ташрифи чоғида содир бўлган, аммо муваффақиятсиз ўтган суиқасддан сўнг, ички ва ташқи разведка хизматлари раҳбарларига ходимлар орасидан жосусни топиш буйруғи берилади. Кореялик хоинни қидириш жараёнида уларнинг бари бир-биридан гумонсирай бошлайди. Ушбу фильмда Ли Жон Же бош ролни ижро этибгина қолмай, лойиҳа продюсери, сценарий муаллифи ва режиссёр сифатида ҳам ишлаган.
“Аколит” (сериал, 2024)
2024 йилда Дисней+ стриминг платформасида премераси бўлиб ўтган илмий-фантастик минисериал бўлиб, “Юлдузлар жанги” франшизанинг бир қисмидир. Сериал сюжети сирли қора кучларга қарши кураш ҳақида ҳикоя қилади.
Сериалнинг дастлабки тўрт қисми томошабинлар орасида турли хил фикр-мулоҳазаларга сабаб бўлган бўлса-да, бешинчи қисмдан бошлаб ижобий баҳоларни ола бошлаган. Унда Ли Жон Же Жеди устози — Сол образини гавдалантирган.
Изоҳ (0)