Rejissyor Xvan Don Xyok tomonidan suratga olingan “Kalmar o‘yini” filmi butun dunyoda mashhurlikka erishdi. 900 million dollardan ortiq daromad keltirgan loyiha dunyoning 90 ta davlatida eng yaxshi filmlar ro‘yxatida yetakchilik qildi. Mazkur serialning davomi chiqishini intiqlik bilan kutar ekanmiz, birinchi mavsumda rejissyorlar tomonidan berilgan, ammo tomoshabin ko‘zi ilg‘amagan sirli belgilar va sahna ortidagi fotosuratlarga diqqatingizni qaratamiz.
Serialning ilk daqiqalarida bosh qahramon telefon raqami ko‘rsatilgan tashrif qog‘ozini oladi. Raqam Janubiy Koreyaning telefonlaridan qisqaroq bo‘lgani uchun tomoshabinlar unga “010” raqamini qo‘shib qo‘ng‘iroq qilaveradi. Ma’lum bo‘lishicha, bu raqam real insonga tegishli bo‘lib, serial ijodkorlari telefonni o‘zgartirmaguncha foydalanuvchi kuniga minglab qo‘ng‘iroqlarni qabul qilishga majbur bo‘lgan.
Filmning sahna rassomi Ghe Gen Son so‘zlariga ko‘ra, “Kalmar o‘yini” loyihasi murakkab tajriba bo‘lgan. Chunki koreys milliy bolalar o‘yinidan xavf va zo‘ravonlikka to‘la qo‘rqinchli sahna yaratish mushkul vazifa edi.
Qo‘riqchilar maxsus kiyimining ham ramziy ma’nosi bor. Rejissyor ularni chumoliga qiyoslagan, chunki tabiatan chumolilar koloniyasida hech qanday bo‘linish bo‘lmaydi. Shu sababli qo‘riqchilar niqobi ortida kim yashiringanini, hatto ularning jinsini ham anglab bo‘lmaydi. Shuningdek, ularning boshi ham hasharot boshi singari maxsus dizaynga ega.
Ofitser Xvan tashkilot hujjatlarida o‘yinchilar ro‘yxatini ko‘zdan kechirar ekan, undagi birinchi ishtirokchi — O Il Namning ismi yo‘qligini payqash mumkin. Bu esa qariya aslida soxta o‘yinchi ekanligini bildiruvchi belgi edi.
Yana bir qiziq tafsilot: barcha o‘yinchilar gaz bilan uxlatib qo‘yilib, yashirin tarzda mashinalarga o‘tkazilgan. O Il Nam esa mashinaga mustaqil o‘tirgan yagona ishtirokchi edi.
Dastlab “Kalmar o‘yini” kamroq epizodlardan iborat bo‘lishi kerak edi, ammo serial yaratuvchisi Xvan Don Xyok yangi voqealar qo‘shishga qaror qildi va politsiya xodimi, akasini topish uchun o‘yinga kelgan Xvan Chun Xo hikoyasini filmga uladi.
“Kalmar o‘yini” da har bir o‘yinning keyingi bosqichida atrof-muhit qorong‘ilashib borgan. Filmdagi zulmat qurbonlarning ko‘payganidan darak beradi. Shisha ko‘prik o‘yini tasvirlangan so‘nggi raund qorong‘i xonada bo‘lib o‘tgan. O‘yinning birinchi qismi esa ochiq havoda, yorug‘likda o‘tkazilgan.
Arqon tortish o‘yinida ishtirokchilarning aktyorlik mahoratini ishga solishga hojat yo‘q edi, chunki ular haqiqatda bor kuchini ishlatib, arqonni tortgan.
Apple kompaniyasi mahsulotlarini film va teleseriallarda faqat ijobiy qahramonlar tomonidan foydalanilgan taqdirdagina ishlatish huquqini beradi. Biroq film oxirida Song Ki Xun va O Il Nam ofisda uchrashganida stolda Apple texnikasini ko‘rish mumkin.
Bir qarashda o‘yingohdagi detallar o‘ta katta hajmga egadek ko‘rinadi. Ular asar mualliflari tomonidan xavfli vaziyat yaratish bilan birga ishtirokchilar o‘zini yosh va himoyasiz boladek his etishi uchun maxsus ishlangan.
“Kalmar o‘yini”ning ikkinchi epizodida ishtirokchilar o‘yinni tark etib, haqiqiy dunyoga qaytadi va u yerda yana moliyaviy muammolarga duch kelib, yana bir bor hayot uchun xavfli o‘yinga qaytishga qaror qiladi. Undagi har bir hikoya qahramonning qanday yakun topishi haqida belgi beradi. Masalan, Chan Dok Su uni ta’qib qilayotganlardan qochib ko‘prikdan sakrab tushadi. Mudhish o‘yinga qaytganda esa u Xan Mi Ne bilan birga shisha ko‘rikdan halokatli tarzda yiqiladi. Chxo San U hayotidagi qiyin vaqtlarda hammomda kostyum kiygan holda o‘tirgani aks etga. O‘yinda esa u yomg‘ir yog‘ayotgan paytda Son Ki Xun bilan bo‘lgan jangda yutqazadi.
Rejissyor Xvan Don Xyok “Kalmar o‘yini”ni suratga olishda juda ko‘p muammoga duch keldi. Serial g‘oyasi hech kimga yoqmas, filmni suratga olishga rozilik bildirmas edi. Shuning uchun u Netflix bilan shartnoma imzoladi. Hujjatga ko‘ra, Netflix tomonidan chiqarilgan film yaxshi natijaga erishgan taqdirda daromadni bo‘lishmaydi va shartnomada belgilangan ma’lum miqdordagi mablag‘ni beradi. Shu sababli “Kalmar o‘yini” deyarli bir milliard dollar daromad keltirganiga qaramay, Xvang Don Xyokka undan hech narsa nasib qilmagan.
Izoh (0)