Koreys dramalari doimo yuqori standartlar asosida ishlab chiqilishi va turli jabhalarni qamrab olishi tufayli butun dunyo bo‘ylab muxlislarning soni ortmoqda va, shu bilan birga, koreys aktyorlari oladigan gonorar miqdori ham oshib bormoqda. Bugungi maqolda nafaqat tomoshabinlarning hurmat va e’tibori, balki mo‘may daromadga sazovor bo‘lgan koreys aktyorlari haqida ma’lumot to‘pladik.
Kim Su Hyon
Har bir epizod uchun gonorar: 423 ming dollar (“Odatiy kunlarning birida” nomli serialda olgan daromadi asosida)
Aktyor Osiyo xalqlari orasida allaqachon juda taniqli edi, ammo 2024-yilda namoyish etilgan “Ko‘z yoshlar malikasi” dramasi unga ko‘plab yangi muxlislarni olib keldi va Koreya kinosining yorqin timsoli maqomini mustahkamladi. Bundan tashqari, Kim so‘nggi uch yil davomida ekranlarda ko‘rinmay qolgani tufayli ko‘plab tomoshabinlar uni sog‘ingan edi. Shu sababli yangi serial premyerasi shov-shuvga boy tarzda bo‘lib o‘tdi.
Li Jong Je
Har bir epizod uchun gonorar: 248 ming dollar (Aktyorning “Kalmar o‘yini” serialida olgan daromadi asosida)
Aktyor Janubiy Koreya kino olamiga uzoq yillar avval kirib kelgan, ammo uning butun jahon miqyosida mashhurlikka erishishiga 2021-yilda Netflix tomonidan suratga olingan “Kalmar o‘yini” sabab bo‘lgan. Li Jon Je bir nechta nufuzli mukofotlarga sazovor bo‘ldi va turli brendlar u bilan shartnoma tuzish takliflari bilan chiqdi. Aktyorga bo‘lgan talab bugungi kunda ham oshib bormoqda, chunki Li Jon Je butun dunyo bo‘ylab millionlab muxlislar kutayotgan serialning ikkinchi mavsumida ham ishtirok etadi.
Song Jung Gi
Har bir epizod uchun gonorar: 228 ming dollar (“Chebollar oilasining kenja o‘g‘li” seriali uchun olgan daromadi asosida)
Koreyaning mashhur aktyorlaridan biri Song Jung Gi 2012-yilda “Bo‘ri bolasi” trillerida bosh rolni ijro etib, katta muvaffaqiyat qozongan. Bu vaqt ichida u olti marta Forbes’ning 40 ta eng nufuzli koreys yulduzlari ro‘yxatiga kiritilgan va to‘rt marta kuchli o‘ntalikka kiritilgan.
Hyon Bin
Har bir epizod uchun gonorar: 113 ming dollar (“Sirli bog‘” serialida olgan maoshi asosida)
Asl ismi Kim Te Phyon bo‘lgan aktyor Koreya televideniyesi tarixidagi eng yuqori reytingga ega dramalardan biri — “Sevgining halokatli qo‘nishi” loyihasining yulduzidir. Hyon Bin uzoq yillardan beri eng ko‘p maosh oluvchi koreys aktyorlaridan biri bo‘lib kelmoqda. Ma’lumotlarga ko‘ra, so‘nggi yillarda uning daromadi yanada oshgan bo‘lishi mumkin, chunki faqatgina o‘n yil avval suratga tushgan filmdagi gonorar miqdori OAVga ma’lum.
Li Min Xo
Har bir epizod uchun daromad: 80 ming dollar
Li Min Xo Madam Tyusso muzeyida mum haykali o‘rnatilgan birinchi koreyalik yulduzdir. Uni Instagram ijtimoiy tarmog‘ida 35 milliondan ortiq obunachi kuzatadi. Bu koreys aktyorlari orasida rekord ko‘rsatkich hisoblanadi. Bugungi kunda Li Min Xo film va seriallarda suratga tushishda faol davom etmoqda va, shu bilan birga, ijtimoiy tarmoqlar va brendlar reklamasi orqali yaxshi daromad olmoqda.
Izoh (0)