Novosibirskdagi sud tojikistonlik erkak Dalerjon Ochilovni 7 yilga umumiy tartibli koloniyaga hukm qildi. U Rossiya prezidenti Vladimir Putinning Ukrainaga bostirib kirish qarorini qoralagandi.
Tergov ma’lumotlariga ko‘ra, u Ukrainadagi urush haqida “bila turib yolg‘on ma’lumot bergan”, “Mudofaa vazirligi harbiy xizmatchilarining ijtimoiy guruhiga ochiqdan-ochiq hurmatsizlik bildirib”, rus ayollarini haqorat qilgan va Putinning Ukrainaga bostirib kirish qarorini qoralagan.
Ochilov Novosibirskdagi bozorning go‘sht bo‘limida ishlardi. U 2012-yilda Rossiyaga kelgan, 2021-yilda yashash guvohnomasini olgan va 2024-yil fevralida Rossiya fuqaroligini olish uchun ariza bergan.
2024-yil mart oyida Ochilov bozorda sotuvchilardan biri bilan janjallashib qolgan. Sotuvchi ayol uning o‘g‘li jang qilayotgan “maxsus harbiy operatsiya”ni Tojikiston fuqarosi qoralagani, migrant “ruslarni yomon ko‘rishi”ni aytgan.
Ayol uning ustidan politsiyaga ariza yozgan, dastlab Ochilovning aybini isbotlovchi dalil topilmagan. Biroq Crocus’dagi teraktdan so‘ng Ochilovga qarshi arizaga Tergov qo‘mitasi e’tibor qaratgan va erkakka nisbatan jinoiy ish qo‘zg‘atilgan.
Ochilovning advokati Natalya Vorontsova ma’lum qilishicha, Tojikiston fuqarosining ishi hech narsa bilan tasdiqlanmagan dalillarga asoslangan.
Izoh (0)