O‘zbekiston va Qirg‘iziston fuqarolari ham Rossiyaga kiritilmayapti — OAV

Markaziy Osiyodan kelgan muhojirlar masalalari bilan shug‘ullanuvchi huquq himoyachisi Valentina Chupik Qirg‘iziston va O‘zbekiston fuqarolari ham Rossiyaga kiritilmayotganini aytdi. Ilgari Tojikistondan kelgan muhojirlarga nisbatan ham xuddi shunday choralar ko‘rilgan.

Chupikning so‘zlariga ko‘ra, so‘nggi kunlarda rossiyalik chegarachilar nafaqat Tojikiston, balki Qirg‘iziston va O‘zbekiston fuqarolariga ham Rossiyaga kirishni ommaviy ravishda taqiqlamoqda. Migrantlar nafaqat aeroportlardan, balki yerusti nazorat punktlaridan ham qaytarib yuborilmoqda.

“Muhojirlarni kirish chog‘ida ommaviy ushlash 24-aprelda boshlangan va 1-mayga qadar Rossiya aeroportlarida 4,5 mingga yaqin odam to‘plangan va taxminan shuncha odam yerusti nazorat punktlariga kiritilmagan.

Rossiyada bunday ommaviy chiqarib yuborish hech qachon kuzatilmagan. Ilgari butun boshli samolyotlar kiritilmagan holatlar bo‘lgan, ammo bu har oyda bir bo‘lardi, endi esa hamma migrantni orqaga qaytarishmoqda”, —deydi huquq himoyachisi.

Uning ta’kidlashicha, aeroport yoki o‘tkazish punktida ushlab turilganlardan to‘rtdan biri Tojikiston fuqarolari, yarmiga yaqini O‘zbekistondan kelgan muhojirlar, qolganlari esa asosan Qirg‘iziston fuqarolaridir. 

“Odamlar oziq-ovqat, suv va hech qanday tushuntirishsiz tor xonalarda bir necha soat ushlab turilib, keyin vataniga jo‘natilayotganidan shikoyat qilmoqda. Ba’zida deportatsiya bir necha kun davom etishi mumkin”, — deydi Valentina Chupik.

Huquq himoyachisi mo‘ylovsiz, ammo soqolli erkaklar va hijobli ayollar kiritilmayotganini ma’lum qildi. 

Rossiyada Tojikiston fuqarolariga nisbatan nazorat 22-mart kuni Moskva viloyatidagi Crocus City Hall da yuz bergan teraktdan so‘ng kuchaydi. “Piknik” guruhi konserti boshlanishidan biroz oldin avtomat bilan qurollangan to‘rt kishi konsert zaliga bostirib kirdi. Ular avvaliga odamlarga qarata o‘q uzdi, keyin esa binoni ichkaridan yoqib yubordi.

Hujum oqibatida 140 dan ortiq odam halok bo‘ldi, bir necha yuz kishi turli tan jarohat va talafotlar oldi. Teraktga aloqadorlikda ayblanib, bir necha Tojikiston fuqarosi qo‘lga olindi. ISHIDning Xuroson bo‘limi hujum uchun javobgarlikni o‘z zimmasiga oldi. Biroq Rossiya maxsus xizmatlari Ukrainani hujumga aloqadorlikda aybladi. Rasman Ukraina teraktga aloqadorligini rad etadi.

ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.