Tojikiston Rossiyadan migrantlar huquqlariga rioya etishni talab qildi

Tojikiston inson huquqlari vakili Umed Bobozoda rossiyalik hamkasbi Tatyana Moskalkovaga migrantlarning huquq va erkinliklari buzilishi yuzasidan murojaat qildi. Uning bayonoti matni matbuot xizmati tomonidan e’lon qilindi.

Bobozoda mehnat muhojirlarining hujjatlari qonuniyligi tekshirilayotgani haqida xabar topishganini ma’lum qildi. Tarmoqlarda tarqalgan videolarga ko‘ra, huquqni muhofaza qilish idoralari xodimlari “qo‘pollik, kaltaklash va haqoratlash kabi taqiqlangan muomala usullarini qo‘llamoqda”.

Tojikiston fuqarolari ko‘pincha chegarada uzoq vaqt, ba’zan bir necha kun davomida tegishli yashash sharoitlari va ovqatlanish ta’minlanmagan holda ushlab turilmoqda. Ular orasida amaldorlar vakillari, talabalar, keksalar, ayollar va bolalar ham bor, deb ta’kidlanadi ombudsman murojaatida.

U Moskalkovadan respublika fuqarolarining Rossiyadagi huquqlariga rioya qilinishini va migrantlarga nisbatan noto‘g‘ri munosabat holatlari tekshirilishini talab qildi.

Bir hafta oldin Tojikiston bosh vaziri Qohir Rasulzoda Rossiyada o‘z fuqarolarining huquq va erkinliklari buzilayotganini ma’lum qilgandi. U tobora ko‘proq fuqarolar Rossiyaga kirishda qiyinchiliklarga duch kelayotganini aytgan. Ularga xavfsizlikni ta’minlash bilan bog‘liq noaniq va mavhum bahonalar bilan kirish rad etilmoqda yoki mamlakatdan chiqarib yuborilmoqda.