Новосибирскдаги суд тожикистонлик эркак Далержон Очиловни 7 йилга умумий тартибли колонияга ҳукм қилди. У Россия президенти Владимир Путиннинг Украинага бостириб кириш қарорини қоралаганди.
Тергов маълумотларига кўра, у Украинадаги уруш ҳақида “била туриб ёлғон маълумот берган”, “Мудофаа вазирлиги ҳарбий хизматчиларининг ижтимоий гуруҳига очиқдан-очиқ ҳурматсизлик билдириб”, рус аёлларини ҳақорат қилган ва Путиннинг Украинага бостириб кириш қарорини қоралаган.
Очилов Новосибирскдаги бозорнинг гўшт бўлимида ишларди. У 2012 йилда Россияга келган, 2021 йилда яшаш гувоҳномасини олган ва 2024 йил февралида Россия фуқаролигини олиш учун ариза берган.
2024 йил март ойида Очилов бозорда сотувчилардан бири билан жанжаллашиб қолган. Сотувчи аёл унинг ўғли жанг қилаётган “махсус ҳарбий операция”ни Тожикистон фуқароси қоралагани, мигрант “русларни ёмон кўриши”ни айтган.
Аёл унинг устидан полицияга ариза ёзган, дастлаб Очиловнинг айбини исботловчи далил топилмаган. Бироқ Crocusъдаги терактдан сўнг Очиловга қарши аризага Тергов қўмитаси эътибор қаратган ва эркакка нисбатан жиноий иш қўзғатилган.
Очиловнинг адвокати Наталя Воронцова маълум қилишича, Тожикистон фуқаросининг иши ҳеч нарса билан тасдиқланмаган далилларга асосланган.
Изоҳ (0)