AQSH Federal tergov byurosi (FTB) Las Vegasdagi Trump International Hotel mehmonxonasi oldida Tesla Cybertruck avtomobilini portlatgan amerikalik harbiy xizmatchining harakatlarini o‘z joniga qasd qilish deb baholamoqda.
Hodisa odatdagidan ko‘proq e’tiborni tortgan bo‘lsa-da, bu jarohatdan keyingi stress hamda boshqa muammolar bilan kurashgan urush faxriysining fojiali o‘z joniga qasd qilishiga o‘xshaydi, dedi 3-yanvar kuni bo‘lib o‘tgan matbuot anjumanida FTB tergovchisi Spenser Evans.
FTB harbiyning shaxsini aniqladi. Avvalroq tergovchilar bu “Yashil beretlar” elita bo‘linmasida xizmat qilgan 37 yoshli Metyu Alan Livelsberger ekani haqida xabar bergan edi. Ularning ma’lumotlariga ko‘ra, Livelsberger yaqinda Germaniyaga xizmat safardan qaytib kelgan va tasdiqlangan ta’tilda bo‘lgan. Serjant beshta “Bronza yulduz” mukofoti bilan, jumladan, jangda ko‘rsatgan jasorati uchun taqdirlangan. GFRdan tashqari, u Ukraina, Gruziya, Tojikiston, Afg‘oniston va Kongoda ham xizmat safarlarida bo‘lgan.
Xayrlashuv maktubida harbiy AQSHni dunyodagi eng yaxshi mamlakat deb atagan
AQSHning saylangan prezidenti Donald Trampga tegishli mehmonxonaga kiraverishda mushaklar ortilgan ijaraga olingan elektr pikap portlab, yetti kishi jarohat olgan edi. Mashina portlashidan oldin erkak boshiga o‘q uzgan.
Tergovchilar ma’lumotlariga ko‘ra, askar Trampdan nafratlanmagan. Amerikaning The Daily Beast nashri yuqori lavozimli amaldorga tayanib xabar berishicha, marhum askar Trampning tarafdori bo‘lgani va noyabr oyida unga ovoz bergan. Harbiy xizmatchining amakisi uning jiyani “o‘z mamlakatini sevgani, Trampni yaxshi ko‘rgani va har doim juda vatanparvar askar bo‘lgani”ni aytgan.
Federal tergov byurosi Las Vegasdagi portlash va Yangi Orleandagi teraktni o‘zaro aloqadorligini rad etdi. Matbuot anjumanida tergovchilar askarning xayrlashuv xatidan parchalarni e’lon qildilar. Xatda askar AQSHni dunyodagi eng yaxshi mamlakat deb ta’riflab, “hozirda o‘limga olib boruvchi kasallikka chalingan va halokatga yuz tutayotgan” deb yozgan.
Askar o‘z harakatini “terror xuruji emas, balki xavotirli chaqiriq” deb atadi.
Amerikaliklar faqat tomosha va zo‘ravonlikka e’tibor berishadi. O‘z nuqtayi nazaringizni mushakbozlik va portlovchi moddalar bilan bo‘lmasa, qanday qilib yetkazish mumkin?, deyiladi maktubda.
Izoh (0)