Qirg‘izistonning Tojikiston bilan chegarasidagi Arka-2 qishlog‘ida 5-yanvar kuni portlash yuz berdi. Bu haqda Davlat xavfsizlik qo‘mitasiga tayanib, “24.kg” xabar berdi.
Dastlabki ma’lumotlarga ko‘ra, uy egasi N.A. eski qurilish materiallari va temir-tersak saqlanadigan ayvon ostini tozalayotganda, noma’lum portlovchi buyum (snaryad)ni topgan va u portlab ketgan. Oqibatda ayol va uning yonida bo‘lgan 12 yoshli qizi jarohatlangan.
Hozirda ular shifoxonada, zarur tibbiy yordam ko‘rsatilmoqda. Ona va qiz ahvoli barqaror deb baholanmoqda.
“Portlash joyi darhol DXX Chegara xizmati muhandislari tomonidan qurshab olingan. Voqea joyida huquqni muhofaza qilish organlari xodimlari ham faoliyat olib bormoqda. Ular sodir bo‘lgan barcha holatlarni aniqlashga qaratilgan keng qamrovli tergov tadbirlarini o‘tkazmoqda”, deyiladi Qirg‘iziston DXX Chegara xizmatida.
Qirg‘iziston va Tojikiston huquq-tartibot idoralari vakillari uchrashgan. Tojikiston tomoniga yuz bergan voqea haqida ma’lumot berilgan.
DXX Chegara xizmati chegaraoldi hududlari aholisini hushyor bo‘lishga, topilgan shubhali buyumlarga tegmaslikka va ular haqida zudlik bilan chegara bo‘linmalari yoki huquqni muhofaza qiluvchi organlarga xabar berishga chaqirmoqda.
Izoh (0)