Samarqand viloyatining Urgut tumanida yashovchi shaxslar Tojikistondan O‘zbekistonga giyohvandlik vositasi olib kirishda ayblanib, 16 yilga qamaldi. Bu haqda O‘zA xabar berdi.
Ma’lum qilinishicha, fuqaro D.A. hozirda jinoyat ishining unga nisbatan qismi alohida ish yurituviga ajratib olingan shaxsning topshirig‘iga ko‘ra, Tojikistonning So‘g‘d viloyati, Panjikent tumaniga borib, narkosavdogardan avvaldan 100 ming dollarga sotib olishga kelishilgan 20 kg 747 gramm opiy moddasi uchun 20 ming dollar beradi.
So‘ngra giyohvandlik vositasini o‘zbek-tojik davlat chegarasiga yaqin bo‘lgan joyga yetkazib berishi kerakligini aytib, O‘zbekistonga qaytadi.
Oradan bir kun o‘tib, D.A. o‘zining jinoiy sherigi bo‘lgan Tojikiston fuqarosi S.M. bilan aylanma yo‘llar orqali Panjikent tumaniga boradi. Ular kelishilgan manzilga narkokuryerlar yetkazib bergan 20 kg 747 gramm opiy giyohvandlik vositasini qabul qilib olib, O‘zbekiston hududiga qaytib o‘tgan vaqtda ushlanadi.
Holat yuzasidan qo‘zg‘atilgan jinoyat ishi doirasida olib borilgan tergov jarayonlarida ushbu noqonuniy ishga Urgut tumanida yashovchi J.R. ham aloqadorligi ma’lum bo‘ldi.
Jinoyat ishlari bo‘yicha Urgut tuman sudi tomonidan fuqarolar D.A. va S.M.lar Jinoyat kodeksining 25,273 (jinoyatga tayyorgarlik ko‘rish va jinoyat sodir etishga suiqasd qilish; giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish), 223-(qonunga xilof ravishda chet elga chiqish yoki O‘zbekiston Respublikasiga kirish) va 246-moddalarida (kontrabanda) nazarda tutilgan jinoyatlarni sodir etganlikda aybdor deb topilib, ularning har biri 16 yil 6 oy muddatga ozodlikdan mahrum qilindi.
Shuningdek, fuqaro J.R. Jinoyat kodeksining 28,25,273 (jinoyat ishtirokchilarining turlari; jinoyatga tayyorgarlik ko‘rish va jinoyat sodir etishga suiqasd qilish; giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) va 28,246-moddalari (jinoyat ishtirokchilarining turlari; kontrabanda) bilan aybdor deb topilib, 16 yil muddatga ozodlikdan mahrum qilindi.
Giyohvand moddalar savdosi
2024-yilning mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)