O‘zbekiston, Qirg‘iziston, Tojikiston davlat chegaralari tutashgan nuqtada 8-yanvar kuni uch mamlakat hukumatlari rahbarlari boshchiligidagi delegatsiyaning uchrashuvi bo‘lib o‘tdi.
O‘zbekiston hukumati matbuot xizmati xabarida qayd etilishicha, mazkur uchrashuv uch davlat chegarasi tutashgan hududda o‘tkazilgani ramziy ma’noga ega. Boisi davlatlar rahbarlarining kuchli siyosiy irodalari va konstruktiv munosabatlarga asoslangan siyosatlari tufayli mintaqada do‘stlik hamda yaxshi qo‘shnichilik, ko‘p qirrali aloqalar mustahkamlanib, yangi pog‘onaga ko‘tarildi. Ayni paytda, Markaziy Osiyo tinchlik va farovonlik hududi ekani amalda o‘z ifodasini topmoqda.
Tomonlar ushbu uchrashuv uch mamlakat davlat rahbarlari — Shavkat Mirziyoyev, Sadir Japarov va Emomali Rahmon o‘rtasida hamkorlik va mintaqaviy integratsiyani mustahkamlash maqsadida davlat chegarasi masalalari bo‘yicha avval erishilgan kelishuvlar doirasida o‘tkazilayotganini ta’kidladi.
“Uch mamlakat bosh vazirlari savdo, logistika, suv-energetika va madaniy-gumanitar aloqalar kabi muhim yo‘nalishlarda o‘zaro hamkorlikni mustahkamlash uchun katta imkoniyatlarga ega ekanini ta’kidlashdi. Ularning fikricha, transchegaraviy va mintaqalararo hamkorlikni rivojlantirish hamkorlikning muhim tarkibiy qismi bo‘lib, bu mamlakatlar o‘rtasidagi o‘zaro hamkorlikni faollashtirish uchun vositaga aylanadi”, deyiladi Qirg‘iziston hukumati matbuot xizmati xabarida.
Ma’lum qilinishicha, uchrashuvda Qirg‘iziston va O‘zbekiston o‘rtasidagi davlat chegarasini delimitatsiya qilish va “Qirg‘iziston—O‘zbekiston davlat chegarasi to‘g‘risida”gi shartnomaga ratifikatsiya yorliqlari almashish jarayoni yakunlangani aytildi. Qirg‘iziston va Tojikiston o‘rtasidagi 2024-yil 4-dekabrdagi davlat chegarasi to‘g‘risidagi bitimda Qirg‘iziston—Tojikiston davlat chegarasining qolgan uchastkalarini tavsiflash jarayonini yakunlashning alohida ahamiyati qayd etilgan.
Uchrashuvda yakunida hukumat rahbarlari bugungi uchrashuv xalqlar va mamlakatlar farovonligi manfaatlaridan kelib chiqqan holda mintaqaning o‘nlab yillardagi taqdirini belgilab berishiga ishonch bildirdi.
“Kelgusida bo‘lib o‘tadigan davlat rahbarlarining uchrashuvi qardosh mamlakatlar o‘rtasidagi yaxshi qo‘shnichilik va ko‘p qirrali sheriklik munosabatlarini rivojlantirishga xizmat qiladi”, deyiladi xabarda.
Ushbu uchrashuv uch davlat — Qirg‘izistonning Botken viloyati, O‘zbekistonning Farg‘ona viloyati va Tojikistonning So‘g‘d viloyati davlat chegaralari tutashgan hududda bo‘lib o‘tdi.
Izoh (0)