Yangi yil arafasida “Uyda yolg‘iz” filmini oilaviy tomosha qilish an’anaga aylanib qolgan. 1990-yilda chiqqan komediya butun dunyo bo‘ylab millionlab tomoshabinlar qalbidan joy olgan. Quyida o‘g‘ri Marvinni obrazini gavdalantirgan 67 yoshli aktyor Deniyel Stern nega Gollivudni tashlab ketgani va hozirda nimalar bilan band ekani haqida so‘zlashamiz.
So‘nggi besh yil davomida aktyor kinolarda suratga tushmayapti va hozirda asosiy e’tiborini fermerlik faoliyati va haykaltaroshlikka qaratmoqda. Hozirda Stern bolalikdagi xotiralarimizda muhrlanib qolgan tentak o‘g‘ridek oddiy inson emas, balki o‘z ishining professionalidir. Hozirda aktyor murakkab haykaltaroshlik namunalarini yasay oladi. Ayniqsa uning “Stuldagi baletchi qiz” asari boshqa mutaxassislarning e’tirofiga sazovor bo‘lgan.
2024-yil may oyida Deniyel Stern o‘zining hayoti, karyerasidagi past va balandliklar yoritilgan memuar asarini chop etdi. Kitobda aktyor disleksiya (o‘qish va yozishda qiynalish) kasalligi bilan qanday kurashgani va kadr ortidagi murakkab hayoti haqida ham aytib o‘tdi.
Ma’lum bo‘lishicha, avvaliga aktyor “Uyda yolg‘iz” filmida rol o‘ynashdan bosh tortgan, bunga gonorarning juda kam ekanligi (sakkiz haftalik syomka uchun 300 ming dollar) sabab bo‘lgan. Buning ustiga, filmning ikkinchi qismida suratga tushish uchun Deniyelga avvalgisidan ikki karra kam gonorar taklif qilingan. Aktyorning hamkasblari esa bir necha barobar ko‘proq miqdorda daromad olishi ma’lum bo‘lgan edi.
Masalan, Marvinning sherigi Garri obrazini gavdalantirgan Jo Peshi bilan ikki million dollar, bosh qahramon Makoley Kalkin bilan esa besh million dollarlik shartnoma imzolangan. Unga ko‘ra, Kalkinga kassa tushumlaridan 5 foiz daromad ham berilishi ko‘zda tutilgan edi. Deniel Sternga esa bundan 4 barobar kam — 1 million dollar gonorar taklifi berilgan.
Ammo rejissyor iltimosiga aktyor oxir-oqibat rozi bo‘lgan va filmda qoyilmaqom obrazni gavdalantirgan. “Uyda yolg‘iz” jahon prokatida 500 million dollardan ortiq daromadga chiqqan. Keyinroq aktyor mazkur Roldan voz kechganida edi, karyerasidagi eng katta hatoga yo‘l qo‘ygan bo‘lishi mumkinligi haqida aytib bergan edi.
Hozirda Deniyel Stern Gollivud mojarolaridan uzoqroq joyda — kichik fermasiga ega xonadonda istiqomat qiladi. Aktyor limon, avokado, mandarin kabi mevalarni o‘stirishni yaxshi ko‘radi va bir vaqtda ijod bilan ham shug‘ullanadi. 2020-yilda bergan intervyusida aktyor juda baxtliligi va hayotidan mamnun ekani haqida aytib o‘tgan.
Izoh (0)