“Asosiy instinkt” filmi bosh qahramoni Sheron Stoun BBC nashriga intervyu berdi. Unda atkrisa Gollivuddagi hayoti, sog‘lig‘idagi muammolar, san’at va siyosat haqida suhbatlashdi. Ammo bir savolni eshitgan 66 yoshli yulduz to‘satdan boshini egib, yuzini qo‘llari bilan yopdi va yig‘lay boshladi.
Aktrisa yoshlikda o‘zingizga qanday tavsiya bergan bo‘lar edingiz, degan savolga:
“Sen buni, albatta, uddalaysan”, deya titroq ovoz bilan javob berdi.
BBC nashri 2024-yilga ko‘ra barchaga ilhom beruvchi va o‘rnak bo‘luvchi dunyoning 100 ayoli reytingiga Sheron Stounni ham kiritdi. 23 yil avval aktrisa og‘ir kasallikni boshidan o‘tkazgan: insult tufayli uning hayoti avval va keyingi qismga bo‘lingan.
“Sen buni hali bilmaysan, lekin, albatta, buning uddasidan chiqasan”, deb takrorladi Stoun.
“Men bu so‘zlarni ko‘zlarim ostiga muhrlagan bo‘lar edim va kimdir bu so‘zlarni yoshligimda menga dalda sifatida aytishini juda istar edim”.
“O‘sha kuni men yerga yiqildim va hatto tez yordam chaqira olmadim” deya so‘zida davom etdi aktrisa.
“Kasalxonadan uyga qaytganimda, People jurnalida meni omon qoladimi yoki yo‘qmi, faqat Xudoga ayon, degan yozuvni o‘qiganimda qattiq sarosimaga tushgan edim”.
Aktrisada arteriyaning yorilishi miyaga qon quyilishiga olib kelgan, bu esa og‘ir formadagi insultni keltirib chiqargan. Stounning so‘zlariga ko‘ra, bunday hollarda omon qolish ehtimoli taxminan 100 dan 1 ni tashkil qiladi. Gollivud yulduzi yurish, ovqatlanish va so‘zlashishni qaytadan o‘rgangan.
G‘am-tashvish qo‘shaloq keladi deganlaridek, sog‘liqdagi muammolar bilan birga aktrisa moliyaviy qiyinchiliklarga duch keldi. Bundan tashqari, o‘sha yili Stoun sobiq turmush o‘rtog‘i Fil Bronshteyn bilan asrab olgan o‘g‘li Roanga vasiylik qilish uchun sudda kurashayotgan edi.
“O‘sha voqealardan keyin uzoq yillar o‘tdi, hozir hammasi yaxshi, barchasi ortda qoldi”.
Sheron Stoun 1992-yilda ekranlarga chiqqan “Asosiy instinkt” filmidagi bosh roli tufayli dunyo miqyosida mashhurlikka erishgan. U hayoti davomida OIV/OITS kasallilariga qarshi kurashish bo‘yicha tadqiqotlarni moliyalashtirgan, turli xayriya loyihalarida ishtirok etgan. Uning OIV/OITSga qarshi kurashdagi sa’y-harakatlari xalqaro hamjamiyat e’tiboridan chetda qolmadi: 2013-yilda Sheron Stoun ijtimoiy adolat va tinchlikka qo‘shgan hissasi uchun Nobel mukofotiga sazovor bo‘ldi.
2023-yilda aktrisaga BM Muxbirlar uyushmasi tomonidan “Yil fuqarosi” faxriy unvoni berildi.
“Asosiy instinkt”dan keyin Stoun 1995-yilda Martin Skorsezening “Kazino” filmida suratga tushdi. Bu rol aktrisaga “Oltin globus” mukofoti va “Oskar” nominatsiyasini olib keldi.
Turinda bo‘lib o‘tgan kinofestivalda esa Sheron Stoun kino rivojiga qo‘shgan ulkan hissasi uchun Stella della Mole mukofotiga sazovor bo‘ldi.
Hozirda Stoun hayotida yangi sahifani ochgan. U professional rassom sifatida o‘z san’at asarlarini butun dunyo bo‘ylab ko‘rgazmalarda namoyish etib kelmoqda. Bu hobbiga kelishiga Stoun pandemiya davrida rasm chizishga qiziqib qolishi sabab bo‘ldi. U Los Anjelesdagi uyi yaqinidagi kichik studiyada rassomchilik bilan jiddiy shug‘ullana boshlagan.
Sheronga eng yoqadigan mashg‘ulot bu tabiat manzarasi va mavhum kompozitsiyalarni chizishdir. Agar unga to‘satdan ilhom kelib qolsa, aktrisa qo‘l ostidagi har qanday qalam bilan surat chizishga tayyor turadi. Masalan, bir kuni u pardoz anjomlari bilan chiroyli rasm yaratgan.
Aktrisaning ta’kidlashicha, insult uni “butunlay boshqa odamga” aylantirgan. Bu o‘zgarishlar hatto uning ovqatlanish odatlariga ham ta’sir qilgan.
“Mening ijtimoiy doiram keskin o‘zgardi. Ba’zi xotiralar butunlay o‘chib ketdi, boshqalari esa, aksincha, yodimga tushdi. Hayotga qarashlarim ham butunlay o‘zgarib ketdi”, dedi u.
Suhbat davomida aktrisa siyosat haqida ham so‘z ochdi. Stoun ochiqchasiga AQSHning hozirgi prezidenti Donald Trampni yoqtirmasligini, uning siyosiy yurishlariga qarshi ekanligini yashirmadi. Saylov kunida u Kamala Harrisni qo‘llab-quvvatlashini aytgan va ijtimoiy tarmoqlarda “Prezident xonim” yozuvi tushirilgan futbolkadagi suratini joylashtirgan.
Intervyu oxirida aktrisa jurnalistning bergan savollari uchun unga minnatdorchilik bildirdi va murakkab kunlarda ham nolishni emas, o‘rnimizdan turib, yo‘lda davom etishni tanlashimiz kerakligi haqida motivatsion nutq bilan suhbatni yakunladi.
Izoh (0)