32,5 million dollar — Gollivud hashamatini his qilish uchun kimlar uchundir kichik summa. Darvoqe, mazkur tufli FQB agentlarini ham qiziqtirib qo‘ygan.
8-dekabr kuni Heritage Auctions savdo uyida aktrisa Judi Garlend “Oz mamlakati sehrgari” (1939) mashhur filmida kiygan yoqut-qizil tufli 32,5 million dollarga sotildi. Bu tuflining tarixi chindan ham ajoyib: 2005-yilda ular Minnesotadagi muzeydan o‘g‘irlangan. Natijada yo‘qolgan buyumni topish uchun FQB kuchlari jalb etilgan va 13 yildan so‘ng, maxsus operatsiya natijasida ularni qaytarishga erishilgan.
Bugungi kunda Judi Garlend ijro etgan Dorotining tuflisi shou-biznes sanoatida sotilgan eng qimmatbaho esdalik buyumiga aylangan. Hozircha xaridorning shaxsi sir saqlanmoqda. Biroq ko‘pchilik allaqachon “Yettinchi yil jarangi” (1955) filmida Merilin Monro kiygan, Uilyam Travilla tomonidan yaratilgan oq bog‘ichli ko‘ylak uchun 5,52 million dollarlik auksion rekordini yangilagan boy odamni izlab topishga urinmoqda.
Shu bilan birga, yana uch juft yoqutdan yasalgan “Doroti tuflisi” borligi ma’lum. Ulardan biri Vashingtondagi Smitson institutining Amerika tarixi milliy muzeyida saqlanadi. Ikkinchisini 2012-yilda Leonardo Di Kaprio va Stiven Spilberg 2 million dollarga sotib olgan, bu tuflilar Kino san’ati va fanlari muzeyining doimiy kolleksiyasiga kiradi. Uchinchisi esa xususiy kolleksionerning mulki hisoblanadi.
Liboslar bo‘yicha dizayner Adrian tomonidan yaratilgan to‘rt juft tufli qizil ipak matodan tikilgan past poshnali “lodochka” shaklida bo‘lgan. Adrian bezak sifatida to‘q qizil yaltiroqlar va kichik bantlardan foydalangan.
Izoh (0)