4-iyun kuni amerikalik kino, televideniye va ovoz aktrisasi, kinorejissyor, prodyuser, BMTning ezgulik elchisi va shunchaki maftunkor ayol Anjelina Joli o‘zining tug‘ilgan kunini nishonladi.
49 yoshli Joli kino faoliyati davomida “Oskar” mukofoti, uch karra “Oltin globus” (tarixda uch yil ketma-ket ushbu mukofotni qo‘lga kiritgan birinchi aktrisa) va ikki karra “AQSH aktyorlar kino gildiyasi” mukofotini qo‘lga kiritdi. Forbes nashri ma’lumotlariga ko‘ra, 2009, 2011 va 2013-yillarda Joli Gollivuddagi eng ko‘p maosh oluvchi aktrisa deb topilgan.
Aktrisa debyutini 1982-yilda “Chiqish yo‘lini izlab” komediyasida boshlagan. Joliga “Lara Kroft: Dahma talonchisi” va “Lara Kroft: Dahma talonchisi-2. Hayot belanchagi” filmlarida ilk mashhurlik va shon-shuhrat olib keldi. Quyida biz Anjelina Joli ishtirokidagi kino sanoatida eng kassabop loyihalarga aylangan filmlarni yodga olamiz.
“Malefisenta”
Rejissyor Robrt Stromberg tomonidan suratga olingan fentezi film Disneyning “Uyqudagi go‘zal” multfilmining remeyki sanaladi. Filmdagi asosiy antagonist — Malefisenta nima uchun yosh va ezgu paridan qasoskor va jahldor sehrgarga aylangani haqida so‘z boradi. Filmining premyerasi 2014-yil 28-may kuni bo‘lib o‘tdi va global kassadagi umumiy daromadi 500 million dollardan oshdi.
“Janob Smit va Smit xonim”
Rejissor Dag Layman tomonidan suratga olingan komediya yo‘nalishidagi film turli mijozlar uchun ishlaydigan va bir vaqtning o‘zida bir-birini yo‘q qilish vazifasi yuklangan er-xotin agentlar haqidadir. Komediyani suratga olish maydonchasida Gollivudda eng ko‘p muhokama qilinadigan juftlik paydo bo‘lgan: Bred Pitt Jennifer Eniston bilan ajrashib, Anjelina Joliga uylangan. Loyiha kassada 480 million dollar to‘plagan va hanuzgacha sevib tomosha qilinadi.
“O‘ta xavfli”
Rossiyalik rejissor Timur Bekmambetov tomonidan Jeyms Makavoy, Morgan Friman va Anjelina Joli ishtirok etgan jangovar film premyerasi 2008-yilda bo‘lib o‘tgan. Syujetga ko‘ra, bosh qahramon Uesli Gibsonning hayoti omadsizlik va muvaffaqiyatsizlikka to‘la bo‘ladi. Gibson bolaligida uni tashlab ketgan otasining shafqatsizlarcha o‘ldirilganini bilib qolgach, hammasi o‘zgaradi. Endi u yollanma qotillarning yashirin jamiyatiga jalb qilinib, u yerda tajribali murabbiylardan dars oladi va oddiy ofis xodimi bo‘lgan Uesli ajoyib reflekslarga va g‘ayritabiiy kuchga ega professional jangchiga aylanadi.
“Sayyoh”
“Oskar” mukofotiga sazovor bo‘lgan film rejissor Florian Xenkel fon Donnersmarkning estetik jihatdan mukammal filmi. Suratga olish ishlari 2010-yilda Parij va Venetsiyada bo‘lib o‘tgan. Bosh rollarda Anjelina Joli bilan birga Jonni Depp ham ishtirok etgan.
“Solt”
Rejissyor Fillip Noys tomonidan suratga olingan jangovar film ssenariysi Kurt Vimmer va Brayan Xelgeland tomonidan yozilgan. Syujet avvalida Shimoliy Koreya qamoqxonasida Evelin Solt Rossiya razvedkasiga tegishli ekanligini tan olish uchun shafqatsizlarcha so‘roq qilinadi. Kutilmaganda, uni ozod qilishadi va mashhur araxnolog Maykl Krauzening sa’y-harakatlari bilan ozod qilinganini bilib qoladi. Maykl keyinchalik Evelin bilan turmush quradi. Ularni oldinda ko‘plab mashaqqatlar kutib turadi. Film premyerasi 2010-yil 23-iyulda bo‘lib o‘tgan.
Izoh (0)