Kino nomini tanlashga uzoq vaqt sarflab, qaysi filmni tomosha qilishni bilmayapsizmi? Gollivud mashhurlari bunda sizga yordam beradi. Quyida Amerika yulduzlari sevadigan va qayta ko‘rishga arziydigan filmlar ro‘yxatini tavsiya etamiz.
Bredli Kuper — “Roma” (2018)
Meksikalik rejissyor Alfons Kuaronning “Roma” filmini tomosha qilganda aktyor Bredli Kuper ko‘z yoshdan o‘zini tiya olmaydi. Ushbu drama film ko‘plab ayollarning nohaq yolg‘iz qolishi va hayot muammolari bilan bir o‘zlari kurashishi haqidadir. Ssenariyga ko‘ra, badavlat shifokor rafiqasi va farzandlari bilan Mexikoda yashaydi. Ular Kleo ismli yordamchini ishga olishadi, u qallig‘idan homilador bo‘lib qoladi. Bola haqida eshitgan yigit uni tashlab tezda qochib ketadi. Shu vaqtda doktor ham ayolini o‘zga uchun tashlab ketadi.
Leonardo Di Kaprio — “Taksi haydovchisi” (1976)
Rejissyor Martin Skorseze tomonidan suratga olingan, Robert De Niro bosh rolni ijro etgan filmni aktyor Di Kaprio juda hurmat qiladi. Vyetnam urushidan qaytgan Trevis Bikl ismli harbiy taksi haydovchisi bo‘lib ishga kiradi va nyu-yorklik mijozlarining gunohlarga to‘la hikoyalarini tinglab shahar kezadi.
Jennifer Lourens — “O‘gay aka-ukalar” (2008)
Ushbu komediya Deyl va Brennan ismli ulg‘aygan tana ichidagi o‘smirlar haqidagi film bo‘lib, ikkisining ota-onasi turmush quradi. Bir uyda yashashga majbur bo‘lgan o‘gay aka-ukalar oxir-oqibat bir-biriga juda o‘xshash ekanligini anglab yetadi. Ammo film so‘ngida ularning ota-onasi ajrimga qaror qiladi. Aktrisa Lourens so‘zlariga ko‘ra, mazkur film hayotidagi eng kulgili komediyalardan biridir.
Elizabet Olsen — “Indiana Jons va taqdir ibodatxonasi” (1984)
Aktrisa Elizabet Olsen “Indiana Jons” franshizasini sevib tomosha qiladi. Unga ayniqsa “Taqdir ibodatxonasi” qismi manzur bo‘lgan. Filmda jasoratli va bilimli arxeolog Himolay tog‘lariga keladi, ammo u yerda mahalliy aholining tuzog‘iga tushadi.
Teylor Svift — “Ajoyib inson” (2019)
Film ssenariysi xonandaning 1989-yilgi albomidan, aniqrog‘i, Clean qo‘shig‘idan ilhomlanib suratga olingan. Teylor Sviftning o‘zi esa film asosida Death by a Thousand Cuts trekini yaratdi. Film syujetiga ko‘ra, musiqa jurnalisti Jenni qallig‘i bilan ajrashganidan so‘ng tushkunlikka tushadi. Uning o‘ziga kelishiga shaxsiy hayotida ham ko‘p muammolarga duch kelgan do‘stlari yordam beradi.
Jennifer Lopes — “Vestsayd hikoyasi” (1961)
Ushbu musiqali filmni xonanda va aktrisa Jennifer Lopes 37 marotaba tomosha qilgan. Ssenariyga ko‘ra, Manxettenda ikki guruh kurash olib boradi. Jet guruhining a’zosi Toni dushman rahbarining qizi Mariyani sevib qoladi. Lopes aytishicha, u Mariya obraziga o‘xshashni sira xohlamaydi. U o‘z maqsadi sari dadil boradigan Anitaga o‘xshashni istagan.
Izoh (0)