Gollivud olamiga kirib kelishdan avval ko‘pchilik yulduzlar o‘zlarini boshqa sohada ko‘rishgan. Hozirda esa ular taqdir taqozosi bilan aktyorlik mahoratining yetuk namoyondalari sifatida dunyoga tanilgan. Quyida yulduzlar agar aktyorlikni tanlamaganda edi, qaysi kasb egasi sifatida ishlashi haqida so‘zlab berdi.
Rayan Reynolds
Komediya janridagi filmlar bilan jahonga tanilgan aktyor Rayan Reynolds aktyorlik yo‘lidan ketmasa edi, ota kasbi — politsiya ofitseri bo‘lishni tanlar edi. Uning otasi maunti deb nomlangan Kanadaning otda yuruvchi politsiyachisi bo‘lgan. Aktyor so‘zlariga ko‘ra, maunti kasbi mamlakatda eng obro‘li ishlardan biridir. Rayanning akasi Terri esa otasi kabi otliq politsiyachi bo‘lib ishlaydi.
Sofiya Vergara
Kolumbiyalik aktrisa Sofiya Vergara bolaligidan tish shifokori bo‘lishni istagan va 2 yil davomida tibbiyot maktabida tahsil olgan. Ammo uning hayoti ota-onasi bilan birga plyajda sayr qilayotgan vaqtda butkul o‘zgarib ketdi. Aktrisa aytishicha, uning oldiga notanish inson kelib Sofiyani suratga tushirishni so‘ragan, 17 yoshli bo‘lajak aktrisa bunga qarshilik bildirmagan va shu tariqa yosh va go‘zal Sofiya modellik biznesiga kirib kelgan.
Margo Robbi
Aktrisaning otasi to‘rtta farzand bilan onasini tashlab ketgan. Turli qiyinchiliklarni boshidan kechirgan Margo kelajakda o‘zini sirkda ko‘rar edi. 8 yoshida professional sirk artisti bo‘lishi uchun maxsus o‘quv kurslariga berishgan. 16 yoshida esa Robbi operadagi yosh qizning ijrosini ko‘rib aktrisa bo‘lishga qaror qilgan va teatrga ishga kirgan.
Anjelina Joli
Joli o‘zining dafn marosimini tashkillashtiruvchi maxsus byurosini ochishni istagan. Aktrisa noodatiy g‘oyalar haqida ko‘p o‘ylaganini tan oladi va tez-tez nuqtayi nazarini keskin o‘zgartirib turadi. Hatto aktrisalik karyerasini tugatsa ham, Anjelina kelajakda dafn marosimi tashkilotchisi sifatida ishlash istagida.
Mettyu Makkonaxi
14 yoshida Mettyu Makkonaxi yurist bo‘lishni orzu qilgan va Texas universitetining ixtisoslashtirilgan maktabiga kirishni istagan. Dunyoda adolat borligiga ishongan yosh Mettyu insonlarni himoya qilishni juda istagan va idealistik qarashli o‘spirin bo‘lgan.
Kerri Vashington
Bolaligida Kerri Vashington “Sea world” (Dengiz olami) shousini sevib tomosha qilgan va kelajakda delfinlar va boshqa dengiz jonzotlari bilan ishlovchi maxsus trener bo‘lishni orzu qilgan.
Jorj Kluni
Maktabda o‘qib yurgan kezlarida yosh Kluni beysbol sport turi bilan shug‘ullanishni yaxshi ko‘rar edi. U istiqomat qiladigan shaharda a’lochi o‘quvchilar uchun beysbol matchlariga bepul biletlar tarqatilar edi. Kluni 16 yoshida professional beysbolchilar safiga qo‘shilishga uringan, ammo bunga hali barvaqt ekanligini anglagach, o‘z qarashlarini o‘zgartirgan.
Rebel Uilson
Bolaligidan aktrisa bo‘lish istagiga atrofdagilar ishonch bildirmagach, Rebel yuridik fakultetga o‘qishgan topshirgan. Kunduz kuni universitetda, kechasi esa aktyorlik darslarida qatnashgan. Bugungi kunda Rebel Uilson komediya yo‘nalishida tanilgan muvaffaqiyatli aktrisalardan biridir.
Izoh (0)