Роуэн Аткинсон 70 ёшда: катта одам танасига қамалган болакай — жаноб Биннинг машҳурликка эришиш йўли

Таниқли британиялик актёр ва тақлид устаси Роуэн Аткинсон 6 январь куни 70 ёшга тўлди. Фаолияти давомида у агент Жонни Инглиш ва Эдинбург герцогидан тортиб, таниқли жаноб Бингача бўлган кўплаб персонажларни гавдалантирди. Актёрнинг юбилейи муносабати билан унинг машҳурликка эришиш йўли ҳақида маълумот берамиз.

Бўлажак комедиячи 1955 йил 6 январда Эрик Аткинсон ва Элла Мей Бембриж оиласида туғилган. У болалигини Англиянинг шимоли-шарқидаги Дарем округида жойлашган Консет шаҳрида ўтказган. Роуэн учунчи фарзанд бўлиб, у иккита акаси бор эди — Родни ва Руперт. Аткинсонлар катта оила бўлишса-да, улар ҳеч қачон молиявий қийинчиликларни бошдан кечирмаган. Актёрнинг отаси илгари фермер бўлган, ўғли туғилганда эса мева-сабзавот сотувчи ширкат директори эди. Ака- укалар Даремдаги хусусий мактабда бошланғич таълим олади. Айтганча, Буюк Британиянинг бўлажак бош вазири Тони Блер ҳам улар билан бирга ўқиган.

Роуэн тўлиқ ўрта маълумотни Сент Бис мактабида олади. Актёрнинг эслашича, спорт ўқувчилар таълим-тарбиясининг муҳим таркибий қисми бўлганлиги сабабли у жисмонан заиф бўлгани учун ўзини камситилгандек ҳис қилган. У айниқса жамоавий ўйинларни ёқтирмасди. Бироқ у табиий фанлар бўйича тенгдошларидан орқада қолмасди. Аткинсон тиришқоқ талаба эди, у баъзида ўқитувчиларни кулгили тарзда пародия қилишни яхши кўрарди —кўпчилик унинг актёрлик қобилияти кучлилигини айтишарди. Ҳатто нутқидаги камчилик ҳам сезилмасди. Қолаверса, Роуэн образга кирганда дудуқланиши ўз-ўзидан йўқоларди. Уни синфдошлари ҳеч ҳам масхара қилишмаган, чунки у ўзи ҳар кимни ўхшатиб, буни қойилмақом тарзда қилиши мумкин эди.

Физика ва математика бўйича имтиҳонларни энг юқори балл билан топширган Роуэн Ньюкасл университетига электротехника бўйича ўқишга киради. Бакалавр даражасини тамомлаб, Оксфордга йўл олади. Бир пайтлар отаси фронтга кетгунга қадар шу ерда ўқиган. Ўша пайтда Аткинсон актёрлик карьераси ҳақида ўйламаганди ҳам. У муҳандис бўлиш ниятида қатъий эди, ҳатто номзодлик диссертациясини ҳимоя қилишни ҳам мақсад қилган. Бироқ тақдир уни бошқа йўлга бошлайди.

Аткинсон ҳаётидаги бурилиш нуқтаси унинг Ричард Кертис билан танишиши бўлди. Бўлажак режиссёр адабиётшунослик факультетида таҳсил олган ва талабаларнинг ҳаваскор театр томошаларида қатнашарди. Улар биргаликда Оксфорд университети “Драматик жамият” деб номланган маҳаллий ижодий гуруҳининг йиғилишида иштирок этишади. Кўп ўтмай, Кертис ва Аткинсон ўзлари ёқтирган жанр — қисқа кулгили скетчлар ола бошлайди.

Шунингдек, француз комедиячиси Жак Татининг “Жаноб Хулотнинг саргузаштлари” номли фильмдаги ролидан илҳомланиб, Роуэн жаноб Бин образини яратади. Қизиғи шундаки, бу қаҳрамоннинг саҳнадаги дебюти Монреалдаги комедия фестивалининг француз бўлимида бўлади.

1978 йилда Аткинсон ўз фаолиятини Аtkinson People муаллифлик радиошоусининг бошловчиси сифатида бошлайди. Болалигидан нутқида муаммоларга дуч келган одам учун бу ғайриоддий касб эди. Бироқ у ўзининг нуқсонини чиройли тарзда енга олди. Бир йил ўтгач, Роуэн катта экранда “Консерваланган кулги” фильми билан дебют қилиб, унда учта эпизодик қаҳрамонни ўйнайди. 

1983 йилда BBC афсонавий-тарихий “Қора илон” ситкомини эфирга узатишни бошлайди, унда Аткинсон бош қаҳрамон, бахтсиз ва худбин Эдинбург герцоги ролини ўйнайди. Сериал олти фасл давом этади ва Британия телевидениесида сезиларли таъсир кўрсатади.

Аммо “Жаноб Бин” кичик экранларда чиққандан кейингина ҳақиқий машҳурликка эришади. Аткинсоннинг ўзи жаноб Бинни катталар танасига қамалган болага қиёслаган. Бу персонаж ёвузлик қилишга қодир эмас, лекин у турли шумликларга аралашиб юради. Кўриниб турибдики, ушбу шоунинг жозибаси ижрочининг мослашувчан юз ифодалари билан боғлиқ. Аткинсоннинг жилмайиши ва юз тузилиши бу ролга жуда мос келган. Жаноб Биннинг ажойиб муваффақиятидан сўнг, Роуэн Британиянинг энг машҳур комедия актёрларидан бирига айланди.

2001 йилда Роуэн ишдан қисқа танаффус қилишга қарор қилади ва оиласи билан Кенияга таътилга кетади. Бу саёҳат у учун жаноб Бин бардош бера олмайдиган синовга айланишини хаёлига ҳам келтирмаганди. Ўша куни бортида актёр ва унинг оиласи бўлган самолёт учувчиси ҳушини йўқотади. Аткинсоннинг рафиқаси уни ҳушига келтирмоқчи бўлган бир пайтда, актёр ҳеч иккиланмай самолёт бошқарувини ўз қўлига олади. Албатта, у омади келишига ишонган, чунки у бу соҳада ҳеч қандай кўникмага эга эмасди.

Сўнгги йилларда актёр катта экранда камнамо, бунга сабаблардан бири ёши бўлса, иккинчиси 7 йил олдин у учинчи марта ота бўлди. Роуэн энди оиласига кўпроқ вақт ажратишга қарор қилган. Бироқ яқин келажакда уни кинотеатрларда яна кўрадиганга ўхшаймиз. Ўтган йили Аткинсон иштирокида иккита фильм суратга олингани маълум бўлди — “Жонни Инглиш”нинг тўртинчи қисми ва жаноб Бин ҳақидаги янги бадиий фильм.