Gollivud orzular ushaladigan va maqsadlar ro‘yobga chiqadigan maskandir. Ammo eng yorqin yulduzlar qatoridan joy olish barchaga birdek nasib etmaydi. Quyida maqsadi yo‘lida ko‘plab qiyinchiliklarni yengib, muvaffaqiyat cho‘qqisiga o‘z kuchi bilan ko‘tarilgan va hozirda Gollivudning eng katta gonorar oladigan aktyorlarini ko‘rib chiqamiz.
Adam Sendler
Forbes jurnaliga ko‘ra, “Oltin globus” va “Emmi” mukofotiga nomzod Adam Sendler Gollivuddagi eng ko‘p maosh oluvchi aktyorga aylandi. Aktyor o‘tgan yili 73 million dollar ishlab topdi. Komediya filmlari qiroli gonorarning katta qismini Netflix bilan hamkorlik shartnomasi va stend-tur konsertlari orqali ishladi. Ushbu pul miqdori haqida tasavvurga ega bo‘lish uchun yiliga 50 ming dollar sarflashni tasavvur qilib ko‘ring. Bunday holda, 73 million dollar 1460 yil davomida sarflash uchun yetarli bo‘ladi. Demak, Sendler bir necha avlodi uchun yetadigan darajada mablag’ to‘plagan, deya olish mumkin. Uning “Katta dada” va “Baxtli Gilmor” kabi filmlari klassikaga aylanib, butun dunyo tomoshabinlarini xursand qilishda davom etmoqda.
Margo Robbi
So‘nggi yilda trendga aylangan “Barbi” filmining bosh qahramoni, avstraliyalik yulduz Margo Robbi 2023-yilning eng ko‘p haq to‘langan aktrisasi bo‘ldi. U eng ko‘p gonorar oladigan Gollivud yulduzlari beshligida ikkinchi o‘rinni egalladi. To‘rt karra “Oltin globus”ga, olti marta BAFTA mukofotiga loyiq ko‘rilgan, “Oskar”ga uch karra nomzod bo‘lgan aktrisaning umumiy daromadi 59 million dollarni tashkil qildi.
Margo Robbining daromadi “Barbi”, “Asteroidlar shahri” va “Soltburn” filmiga prodyuserlik qilishdan olgan foydasiga asoslangan.
Tom Kruz
Tom Kruz Gollivudning tirik afsonasi hisoblanadi U o‘zining ajoyib tryuklari va aktyorlik mahorati bilan tomoshabinlarni hayratda qoldirishda davom etmoqda. Kruz o‘tgan yili 45 million dollar ishlab topdi va to‘rt karra “Oskar”ga nomzod, uchta “Oltin globus” sovrindori hamda Kann kinofestivalining faxriy “Palma novdasi” sohibi bo‘ldi.
62 yoshli aktyor uchun pulning asosiy qismi “Uddalab bo‘lmas topshiriq-7” filmidan tushgan. Byudjeti 291 million dollar bo‘lgan film Kruz karyerasidagi va Paramount kompaniyasi tarixidagi eng qimmat kartinaga aylangan.
Rayan Gosling
Dunyodagi eng yoqimtoy erkaklardan biri deya tan olingan aktyor Rayan Gosling bir qancha yirik loyihalarda, jumladan, “Barbi” filmida Ken roli orqali yillik daromadi 50 million dollarga yetdi.
Mett Deymon
Mett Deymonning ham yillik daromadi katta miqdorni tashkil qiladi. Aktyor hozirda zamonamizning eng ko‘p maosh oladigan aktyorlarning kuchli beshtaligida turibdi. O‘tgan yilda Deymon “Oppengeymer” hamda “Bornning qaytishi” filmlari orqali 25 million dollar daromad ko‘rdi.
Umuman olganda, yuqorida ismlari tilga olingan barcha aktyorlar o‘z iste’dodi, mehnatsevarligi va qat’iyati tufayli shuhrat va boylik cho‘qqilarini zabt eta oldilar. Ular o‘z ustida ishlash va tinimsiz mehnat qilish orqali muvaffaqiyatga erishish mumkinligini amalda isbotlab berdi.
Izoh (0)