Ba’zan xotiramiz bizga pand berib turishi va muhim sana yoki voqealar yodimizdan ko‘tarilishi mumkin. Gollivud yulduzlari ham bundan mustasno emas. Quyida o‘zi ijro etgan mashhur rollarni unutib qo‘ygan (yoki o‘zini unutgandek ko‘rsatadigan) aktyor va aktrisalar haqida so‘zlashamiz.
Pol Bettani — “Temir odam”
Aktyor boshqa obrazlariga qaraganda aynan Marvel olami filmlaridan so‘ng mashhurlikka erishgan. Ammo Pol Bettani fantastika janrdagi loyihada suratga tushganini bir marotaba esidan chiqarib qo‘ygan. Aktyor Vijn ismli super qahramonni o‘ynashdan avval 2008-yilda “Temir odam” filmida Toni Starkning sodiq sun’iy intellekti — Jarvis obrazini gavdalantirgan.
Intervyulardan birida u “Temir odam” filmida ishtirok etganini unutib qo‘ygani haqida so‘zlab bergan edi:
Bir kuni kimdir menga: Sizning “Temir odam”dagi rolingiz bizga juda yoqadi”, dedi. Men esa ‘Meni boshqa aktyor bilan adashtirib yubordingiz, chog‘i’, deb javob bergan edim”.
Jared Leto — “Shahar afsonalari”
Balki aktyor Jared Leto shunchaki jurnalistlarni bilan hazillashgandir, lekin 1998-yilda suratga olingan “Shahar afsonalari” qo‘rqinchli filmida ishtirok etganini eslay olmasligi haqida qat’iyat bilan aytgan edi. Qiziqarlisi, yulduz film nima haqida ekanligini bilmasligi haqida ham bot-bot takrorlagan:
“Bu qaysi film edi? Men aniq bu filmda ishtirok etmaganman. Loyiha haqida eshitmaganman ham. Balki qisman xotiramni yo‘qotgandirman, kim biladi?” degan edi aktyor.
Gvinet Peltrou — “O‘rgimchak odam: Uyga qaytish”
Aktrisa Gvinet Peltrou 2017-yilda premyerasi bo‘lib o‘tgan “O‘rgimchak odam: Uyga qaytish” filmida Pepper Potts rolini ijro etgan. Avvaliga u hatto qanday filmda suratga tushgani haqida tasavvurga ham ega bo‘lmagan. Keyinchalik amerikalik boshlovchi Jimmi Kimmelga loyihani aslida “Qasoskorlar” filmining davomi deb o‘ylaganini tan olgan.
Shuningdek, u aktyor va rejissyor Jon Favrou bilan “Oshpazlar shousi”da ishtirok etganda suhbat “O‘rgimchak odam: Uyga qaytish” filmiga borib taqalgan. Shunda Peltrou boshlovchidan nega bu film haqida savollar berayotgani, axir aktrisa unda rol o‘ynamaganligi haqida so‘zlab tomoshabinlarni hayratda qoldirgan.
Anna Kendrik — “Sumerki”
Beshta qismdan iborat franshizada Bellaning dugonasi — Jessika rolini o‘ynagan Anna Kendrik vampirlar haqidagi loyiha tugagach, 2009-yilda “Samolarda uchsaydim” filmi uchun “Oskar”ga nomzod bo‘lgan. 2018-yilda Anna o‘zining shaxsiy blogida shunday xabar qoldirgan:
“Tavba! Hozirgina “Sumerki”da rol o‘ynaganim yodimga tushdi!”
Jek Blek — “Ta’tillar almashganda”
2006-yilda namoyish etilgan “Ta’tillar almashganda” filmi komediya janridagi rollari bilan tanilgan Jek Blekka yangi janr — romantik komediyada ishlash imkonini berdi. Hozirda mazkur film butun dunyo tomoshabinlari tomonidan sevib ko‘riladigan haqiqiy klassikaga aylangan.
2019-yilda qizil gilamda aktyordan uning Rojdestvo mavzusidagi sevimli filmi haqida so‘rashganda Blek “Elf” ekanligini aytgan. Intervyu olayotgan jurnalist nima uchun o‘zingiz ishtirok etgan filmni nomlamadingiz, deganda aktyor bir zumga savolni tushunmay qolgan:
“Men Rojdestvo haqidagi filmda suratga tushganmanmi? Tushunmadim? Qaysi film ekan? Ha, aytgancha, “Ta’tillar almashganda” ham bor edi-ku” deya javob bergan.
Izoh (0)