Ukrainada prezidentlik va parlament saylovlari urush tugagan yili bo‘lib o‘tadi. Bu haqda prezident Vladimir Zelenskiy ma‘lum qildi.
Siyosatchiga ko‘ra, harbiy holat tugaganidan so‘ng parlamentda saylov o‘tkazish uchun ovoz berish va 90 kundan keyin uni tashkil etish mumkin bo‘ladi. Zelenskiy saylovlarni urush paytida ham o‘tkazish mumkinligini aytdi. Ammo buning uchun qonunchilik va ovoz berish tizimini o‘zgartirish zarur.
“Bu juda mushkul bo‘ladi, chunki jamiyat bunga qarshi. Nima uchun jamiyat qarshi? Chunki biz ishonchli saylovlar o‘tkazilishini xohlaymiz. 8,5 million kishi chet elga chiqib ketgan.
Bu millionlab odamlarning ovoz berishi uchun infratuzilma yaratish kerak. Okkupatsiya qilingan hududlarda millionlab odamlar bor. Eng adolatsiz ko‘rinadigan narsa — millionlab harbiylar ishtirokisiz ovoz berishdir. Bu imkonsiz”, dedi Ukraina prezidenti.
Shuningdek, u ikkinchi prezidentlik muddatiga nomzodini qo‘yish-qo‘ymasligini ham bilmasligini aytdi.
“Bu urushning qanday yakunlanishiga bog‘liq. Bu asosan odamlarga, birinchi navbatda oilamga bog‘liq. Bizda buni muhokama qilish imkoniyati ham bo‘lmadi, chunki hozir bu haqda o‘ylamayapmiz”, dedi u.
Ukrainada prezidentlik va parlament saylovlari 2024-yilda o‘tkazilishi kerak edi, biroq harbiy holat tufayli bo‘lib o‘tmadi. Ukraina qonunchiligi urush paytida saylovlarni o‘tkazishni taqiqlaydi.
Izoh (0)