Ukraina Rossiya tomonidan bosib olingan hududlardan voz kechish evaziga NATOga qo‘shilish ssenariysini ko‘rib chiqishi mumkin. Bu haqda prezident Vladimir Zelenskiy amerikalik podkaster Leks Fridmanga bergan intervyusida ma’lum qildi.
Podkaster prezidentdan Ukraina NATOga a’zo bo‘lish taklifi evaziga Lugansk, Donetsk, Zaporojye va Xerson viloyatlari, shuningdek, Qrimdan voz kechishi ehtimolini so‘radi. Zelenskiy Ukraina bunga ba’zi shartlarga rioya qilgan taqdirdagina rozi bo‘lishini aytdi.
“NATO Ukrainaga qonuniy ravishda taklif qilinmoqda va biz Ukrainaning boshqa hududlarini tan olmasak-da, NATO Ukraina nazoratidagi qismda faoliyat yuritishi mumkin. Bu haqda kelishib olsa bo‘ladi. Bunga ishonchim komil”, dedi Zelenskiy.
Prezident aniqlik kiritib, bunday ssenariy faqatgina Ukraina urushni tugatishning diplomatik yo‘lini ko‘rgandagina amalga oshishi mumkinligini aytdi.
“Bu birinchisi. Ikkinchisi — qurol-yarog‘ to‘plami. Men buni ommaviy ravishda aytishga tayyor emasman, lekin prezident Tramp uchun bu sir emas. Bu asosan AQSHning xohishiga bog‘liq. Chunki qisman Yevropa Ittifoqi va qisman AQSH beradi. Bu to‘plam uchun yakdillik kerak”, dedi u.
Zelenskiy Tramp Rossiya energetikasining bozorga kirishiga yo‘l qo‘ymaslik uchun unga qarshi sanksiyalar joriy etish kerakligini ta‘kidladi. Ukraina prezidenti bu, birinchi navbatda, Vashington uchun foydali bo‘lishini aytdi.
♦ Ukraina shartlari
Ukraina qo‘shinlarni 1991-yil chegaralariga olib chiqishni nazarda tutuvchi “tinchlik formulasi”ni amalga oshirishni talab qilmoqda. Gap 2014 va 2022-yillarda Rossiya tomonidan u yerda o‘tkazilgan “referendumlar” va Ukrainaning Qrim, Donetsk, Lugansk, Xerson va Zaporojye viloyatlari noqonuniy anneksiya qilingani haqida ketmoqda. Moskva “tinchlik formulasi” asosida muzokaralar olib borish imkoniyatini istisno qiladi.
♦ Rossiya shartlari
Putin o‘t ochishni to‘xtatish uchun o‘z shartlarini ilgari surdi, jumladan, Ukraina qo‘shinlari o‘zini o‘zi mustaqil deb e’lon qilingan DXR, LXR, Xerson va Zaporojye viloyatlaridan olib chiqilishi, ushbu to‘rtta hudud va Qrim go‘yoki xalqaro miqyosda Rossiyaning bir qismi sifatida tan olinishi, Ukrainaning NATOga a’zolikdan voz kechishi va sanksiyalarni olib tashlash. Zelenskiy bu taklifni “ishonib bo‘lmaydigan” ultimatum deb atadi.
Izoh (0)