5-yanvar kuni Moskva vaqti bilan soat 09:00 atrofida rossiyalik harbiy muxbirlar Ukraina armiyasi Sudja markazidan shimolda joylashgan Bolshoye Soldatskoye qishlog‘i va Berdin xutori (kichik qishloq) bo‘ylab hujumga o‘tgani haqida yoza boshladi. Ularning fikricha, Ukraina qurolli kuchlari yarim tunda minalangan maydonlarni tozalab chiqqan. Qolaversa, mazkur yo‘nalishda elektron urush tizimlarining yirik konsentratsiyasi kuzatilgan.
Bu esa o‘z navbatida, Rossiya armiyasining FPV-dronlarini amalda samarasiz qilib qo‘ydi. Tarmoqlarda tarqalayotgan tasvirlar mazkur iddaoni tasdiqlaydi. Ularda Ukraina zirhli texnikalariga yaqinlashgan xudkush dronlar operator bilan aloqani yo‘qotgani ko‘rinadi.
Biroq optik tola kebelli dronlar elektron urush tizimlari uchun daxlsizligicha qolmoqda. Bu Ukraina bo‘linmalariga salmoqli talafot yetkazyapti.
Tarmoqlarda bu kabi tasvirlardan bir nechtasiga duch kelish mumkin. Tass axborot agentligi RF Mudofaa vazirligiga tayangan holda ukrainaliklarning 2 ta tank va 12 ta zirhli texnikadan iborat hujum bo‘linmasi Berdin yaqinida tor-mor etilgani haqida xabar bergan.
Biroq harbiy muxbirlar orasida yuqoridagi da’volarni inkor qiluvchilar ham bor. Ularga ko‘ra, Ukraina armiyasi “nol nuqtasi”dan 2,68 kilometr ilgarilab, Berdin xutori va Novosotnitskiy posyolkasini egallab olgan. Bu yerdan Bolshoye Soldatskoye qishlog‘igacha bo‘lgan masofa taxminan 6 kilometrni tashkil qiladi.
Rossiya armiyasi bunga tayyorgarlik ko‘rganmidi?
O‘tgan yilning avgust oyidagi amaliyotdan farqli navbatdagi hujum Rossiya armiyasi uchun “syurpriz” bo‘lmadi. “Romanov Lite” Telegram kanali muallifi “Ukraina armiyasi 20 ming xizmatchidan iborat qo‘shin to‘plagani, 7-yanvarga qadar Kursk yo‘nalishida qarshi hujum boshlanishi” haqida 30-dekabrdayoq ogohlantirib chiqqandi.
Shunga qaramay, Kiyev mazkur amaliyotga qancha qo‘shin jalb qilgani noma‘lumligicha qolmoqda. Ukraina Qurolli kuchlari Bosh shtabi tafsilotlarni ochiqlamayapti. Biroq kundalik hisobotda 5-yanvar kuni Kursk viloyatida harbiy to‘qnashuvlar soni keskin oshgani qayd etilgan. Budan bir kun oldin, 4-yanvar kuni kun mazkur yo‘nalishda 33 ta harbiy to‘qnashuv kuzatilgan bo‘lsa, yakshanba kuni soat 16:00 ga qadar 42 tasi qayd etilgan, 12 ta jang hali ham davom etmoqda.
Ukraina Qurolli kuchlarining Kursk yo‘nalishida jang qilayotgan 116-mexanizatsiyalashgan brigadasi tarkibidagi “Khorne Group” bo‘linmasi ham batafsil izoh berishdan bosh tortdi. Ukraina armiyasining eng jangovar bo‘linmalaridan biri hujum amaliyotlari borayotganini bildirish bilan cheklandi.
Harbiy muxbir Kotsning ta’kidlashicha, Ukraina armiyasi e’tiborni Bolshoye Soldatskoye qishlog‘i va Berdin xutoriga qaratib, asosiy kuchini boshqa yo‘nalishlarga tashlamoqchi.
Yana bir urush targ‘ibotchisi Yuriy Podolyaka ham uning fikrini dastaklab, Ukraina Qurolli kuchlarining Kursk viloyatidagi hujumlaridan maqsad chalg‘ituvchi amaliyot bo‘lishi mumkinligini aytdi.
Biroq Kursk yo‘nalishida faol hujumlarni boshlagan faqat Ukraina emas. Rossiya armiyasi ham Malaya Lokniya, Sverdlikovo, Leonidovo yo‘nalishlarida janglarni boshladi. Hozircha qolgan tafsilotlar noma'lum.
Maqsad nima?
Pokrovsk yo‘nalishidagi vaziyat og‘irligicha qolmoqda. Rossiya Qurolli kuchlari allaqachon Kuraxovo markaziga kirib keldi. Kiyev shaxsiy tarkib defitsitini qoplash uchun safarbarlik yoshini 18 gacha tushirmoqchi. Shunday vaziyatda qimmatli resurslarni Kursk frontiga tashlash bahsli qaror hisoblanadi.
Kuzatuvchilar bunga harbiy ahamiyati bo‘lmagan siyosiy qadam sifatida baho bermoqda. Ukraina rahbariyati bo‘lg‘usi muzokaralardagi pozitsiyasini mustahkamlashni maqsad qilgan bo‘lishi mumkin. Qo‘shma Shtatlarning saylangan prezidenti inauguratsiyasi tobora yaqinlashib kelar ekan, har ikki tomon o‘z ixtiyoridagi kartalar ustida ish olib boryapti.
Izoh (0)