AQSH Ukrainaga yordam ko‘rsatish bo‘yicha muhim qarorni tayyorlamoqda. Bu haqda Ukraina prezidenti Vladimir Zelenskiy kechki murojaatida ma’lum qildi.
Prezidentning so‘zlariga ko‘ra, bugun, 30-dekabr kuni bu haqda rasman e’lon qilinadi.
“Bilaman, Amerika Ukrainaga yordam ko‘rsatish bo‘yicha muhim qarorni tayyorlamoqda. Rasmiy e’lonni ertaga (30-dekabr) kutyapmiz: bu bizning jangchilarimiz uchun yirik yordam paketlari bo‘ladi. Bu yillar davomida Ukrainani himoya qilishda ishlayotgan mexanizm”, dedi Zelenskiy.
Prezident shuningdek, e’lon qilinadigan yordam frontda barqarorlikni ta’minlashga xizmat qilishini ta’kidladi. Ayniqsa, hamkorlar yordami Ukrainada ko‘proq jangchilarining hayotini saqlab qolishga yordam beradi.
“Biz boshqa hamkorlarimizning yordamini ham saqlab qolish uchun ishlayapmiz”, dedi prezident.
20-dekabr kuni AQSH prezidenti Jo Bayden ma’muriyati yaqin kunlarda Ukrainaga 1,2 milliard dollarlik yordam paketini e’lon qilishi ma’lum bo‘lgandi.
Bundan tashqari, prezident Zelenskiy AQSH tomonidan harbiy yordam yetkazib berish hajmi oshganini ta’kidlagan edi. Bu qo‘llab-quvvatlash frontdagi vaziyatni muvozanatlashtirishga yordam bermoqda. Xususan, hamkorlarning yordami tufayli ukrainalik harbiylar Rossiya hujumlarining sur’atini pasaytirishga erishmoqda.
Avvalroq Rossiya tomoni AQSHning saylangan prezidenti Donald Trampning Ukrainadagi mojaroni hal qilish bo‘yicha takliflariga rozi bo‘lmagani xabar qilingandi.
Izoh (0)