Ukraina prezidenti Vladimir Zelenskiy rossiyalik hamkasbi Vladimir Putinning shartlariga muvofiq o‘t ochishni to‘xtatish taklifiga keskin noroziligini bildirdi.
Yevropa ittifoqi rahbarlari bilan uchrashuvda u Rossiya rahbarini “aqldan ozgan”ini aytib, u “o‘ldirishni yaxshi ko‘rishini” ta’kidladi.
Zelenskiy Putin bilan har qanday muzokaralar yangi hujumga tayyorgarlik ko‘rishda ishlatilishi mumkinligini, shu sababli u AQSHning saylangan prezidenti Donald Tramp taklif qilgan o‘t ochishni to‘xtatish g‘oyasiga qarshi ekanini qayd etdi.
Zelenskiy ehtimoliy muzokaralar oldidan qat’iy pozitsiyani egallash uchun Ukrainaga “haqiqiy reja” kerakligini aytdi. U AQSH va YI mojaroni hal qilish bo‘yicha umumiy yo‘nalish ishlab chiqa olishiga umid bildirsa-da, biroq Yevropa xavfsizlik kafolatlarining o‘zi yetarli emasligini qo‘shimcha qildi. U Qo‘shma Shtatlardan ham yordam kerakligini e’tirof etdi.
Yevropa ittifoqining 27 nafar yetakchisi bilan uchrashuvda Zelenskiy zarur miqdordagi havo mudofaa tizimlarini Kiyevga topshirish bo‘yicha yangi va’dalarni olmagan.
Germaniya kansleri Olaf Shols ham Putin bilan “majburiy tinchlik” g‘oyasiga qarshi chiqib, Ukrainaning fikrini hisobga olmagan tinchlik kelishuvini qabul qilib bo‘lmasligini aytdi.
Bir kun avval Putin Ukraina masalasi bo‘yicha Moskva hech qanday dastlabki shartlarsiz, biroq Istanbul kelishuvlari va joylardagi real vaziyatga asoslanib muloqot olib borishga tayyorligini ma’lum qilgandi.
Shuningdek, u Kreml Ukrainaning istalgan vakili, shu jumladan, agar saylovlarda qatnashib, qonuniy maqomga ega bo‘lsa, Vladimir Zelenskiy bilan ham muzokaralar olib borishga tayyorligini ta’kidladi. Kreml shartnomalarni faqat qonuniy hokimiyat bilan imzolashini aytdi.
Prezident Rossiyaning tezislari avvalroq, jumladan, iyun oyida Rossiya TIVdagi nutqida bayon etilganini qo‘shimcha qildi. Putin iyun oyida Ukrainaga tinch yo‘l bilan vaziyatni hal qilish bo‘yicha taklif bilan chiqqan edi. U mojaroni muzlatishni emas, balki uni to‘xtatishni ilgari surib, Ukraina qo‘shinlarini LXR, DXR, Xerson va Zaporojye viloyatlaridan olib chiqishni, Ukrainaning NATOga qo‘shilish rejalaridan voz kechish shartlarini ma’lum qilgandi.
Izoh (0)