Rossiya qo‘shinlari Ukraina sharqida oldinga siljishda davom etmoqda, ularni to‘xtatish va frontni barqarorlashtirish juda qiyin ish, deya Ukraina prezidenti Vladimir Zelenskiy ma’lum qildi.
“Yanvar oyida frontni barqarorlashtirish uchun qo‘ldan kelgancha harakat qilamiz. Bu juda mushkul”, deydi Zelenskiy.
Ukraina prezidenti, shuningdek, Amerika harbiy yordami bilan kelgusida nima bo‘lishini bilmasligini aytdi.
“Biz Amerikaning yangi ma’muriyati bizni qo‘llab-quvvatlashini kutamiz”, deya tushuntirdi u.
Zelenskiyning ta’kidlashicha, AQSHning saylangan prezidenti Donald Tramp inauguratsiyadan keyin birinchilardan bo‘lib uni qabul qilishiga va’da bergan.
“O‘ylaymanki, inauguratsiyadan keyin Tramp bilan uchrashamiz. Biz butun rejani tushungan holda ish boshlaymiz”, dedi Ukraina rahbari.
Zelenskiy Trampning tinchlik rejasi Kiyev pozitsiyasiga to‘g‘ri kelishiga umid bildirdi, shu bilan birga Tramp boshqaruvidagi Vashington Moskva bilan ham faol aloqaga kirishishini istisno etmadi.
“Bu tushunarli, chunki ular kim nimaga tayyorligi kabi ko‘p tafsilotlarni o‘rganishadi. O‘ylaymanki, birinchi davr shunday bo‘ladi. Keyingi qadamlar urushning qizg‘in bosqichiga yakun yasashi kerak”, deya qo‘shimcha qildi Zelenskiy.
2024-yilning so‘nggi haftalarida Rossiya Mudofaa vazirligi muntazam ravishda Donbassdagi olg‘a siljish va ko‘proq aholi punktlari ustidan nazorat o‘rnatilayotgani haqida xabar berib turdi.
30-dekabr kuni DXRning Novoolenovka qishlog‘i rus qo‘shinlari nazoratiga o‘tdi. Qishloq Pokrovskiy tumanidagi Ukrainka va Novoelizavetovka aholi punktlari yaqinida joylashgan. Bungacha ukrainalik harbiylar Pokrovsk yaqinidagi bir nechta aholi punktlarini: Zelenovka, Uspenovka va Novopustinka, Novy Trud, Novotroitsk va boshqalarni tark etgan.
Zelenskiy xalqqa qilgan Yangi yil murojaatida Tramp Ukraina mojarosini tinch yo‘l bilan hal qilishga qodirligini qayd etgan.
“Amerikaning yangi prezidenti tinchlik o‘rnatishi, Putinning agressiyasiga chek qo‘ya olishiga shubham yo‘q. Bu ikki tomonni tinchlantirish kerak bo‘lgan ko‘cha bezoriligi emas. Men ishonamanki, biz Qo‘shma Shtatlar bilan birgalikda Rossiyani adolatli tinchlikka majburlashga qodirmiz”, degan edi Ukraina prezidenti.
Izoh (0)