NATO ittifoq davlatlari bilan qurolli mojaro yuzaga kelgan taqdirda Rossiya hududiga “yuqori aniqlikdagi zarbalar” berishni muhokama qilmoqda. Bu haqida NATOning harbiy qo‘mitasi rahbari admiral Rob Bauer ma’lum qildi.
U NATO o‘zining mudofaa ittifoqi sifatidagi mohiyatiga munosabatini o'zgartirganini ijobiy deb atadi.
Bundan tashqari, Rob Bauer “qachon bizga hujum qilisharkin, biz shundan keyingina harakatni boshlaymiz” qabilidagi qarash ham o‘zgarganini e’tirof etdi.
“Agar Rossiya bizga hujum qilsa, kutib o‘tirish emas, balki Rossiyaning zarba yo‘llovchi qurilmalarini yo‘q qilishga urinish oqilona qaror bo‘ladi. Bizga hujum uyushtirishda ishlatiladigan qurilmalarni yo‘q qilish uchun aniq zarbalar kombinatsiyasi kerak va biz birinchi bo‘lib zarba berishimiz kerak”, deya qo‘shimcha qildi Bauer.
Avvalroq Yevropa davlatlari o‘z qo‘shinlarini Ukrainaga yuborish ehtimolini muhokama qilayotgani xabar berilgandi.
Gap birinchi navbatda Fransiya va Buyuk Britaniya haqida ketmoqda. Bu masala 2024-yil fevral oyida ham muhokama qilingan. Biroq Yevropa ittifoqining barcha davlatlari ham taklifni qo‘llab-quvvatlamagan.
Le Monde manbasiga ko‘ra, Fransiya va Britaniya o‘rtasida Rossiya-Ukraina mojarosi doirasida “mudofaa sohasidagi hamkorlik” bo‘yicha muzokaralar olib borilmoqda. Bunga 11-noyabr kuni Britaniya bosh vaziri Kir Starmerning Fransiyaga tashrifi turtki bo‘lgan. Hozirda muzokaralar “maxfiy tarzda” kechmoqda.
G‘arb qo‘shinlarini urushga yuborish Yevropa ittifoqining 2025-yil yanvarida Donald Tramp prezidentlik lavozimini egallaganidan so‘ng AQSH Ukrainaga yordamni qisqartirishi mumkinligi haqidagi xavotirlariga bog‘liq.
22-noyabr kuni NATO bosh kotibi Mark Ryutte AQShning saylangan prezidenti Donald Tramp bilan ilk uchrashuvini o‘tkazgandi.
Tomonlar “alyans oldida turgan global xavfsizlik masalalarini” muhokama qildilar, deb xabar bergan NATO matbuot kotibi.
Washington Post gazetasi NATO bosh kotibi Donald Tramp bilan Rossiya-Ukraina mojarosini tinch yo‘l bilan hal qilish strategiyasini muhokama qilishini ma’lum qilgan.
Izoh (0)