Ukraina 2025-yilda 30 mingta uzoq masofaga uchuvchi dron va 3 mingta raketa ishlab chiqarishni rejalashtirmoqda.
Bu haqda Ukraina bosh vaziri Denis Shmigal ma’lum qildi.
Hukumat rahbari taʼkidlaganidek, 2025-yilda Ukrainada mudofaa va xavfsizlikni taʼminlash uchun 2 trillion 230 milliard grivna (53 milliard dollar) ajratilgan. Qurol va harbiy texnikaga sarflanadigan xarajatlar kamida 739 milliard grivnani (17,6 milliard dollar) tashkil etadi.
Shmigalning so‘zlariga ko‘ra, Ukraina harbiy-sanoat majmuasi korxonalari ishlab chiqarish quvvatlarini 30 milliard dollargacha oshirishni rejalashtirmoqda.
“Biz uzoq masofaga uchuvchi komponent va raketa dasturiga alohida e’tibor qaratamiz, ukrainalik korxonalar kamida 30 ming dona uzoq masofaga uchuvchi dronlarni ishlab chiqarishni rejalashtirmoqda”, dedi Shmigal.
Bundan tashqari, Ukraina “Daniya modeli”ni rivojlantirishda davom etadi, unga ko‘ra sheriklar Ukraina armiyasi ehtiyojlari uchun mahalliy mudofaa sanoatidan qurol sotib oladilar. 2025-yilda shu yo‘l bilan 1 milliard dollardan ortiq mablag‘ jalb etilishi rejalashtirilgan.
Izoh (0)