2017-yilda Nyu-Yorkda terakt sodir etgan O‘zbekiston fuqarosi Sayfullo Soyipov ishi bo‘yicha sud majlisida hakamlar hay’ati qatl hukmi uchun zarur bo‘lgan yakdil qarorga kela olmadi. Shuning uchun sudlanuvchi uzoq muddatga ozodlikdan mahrum qilinadi.
2023-yilning yanvar oyi boshida hakamlar hay’ati Soyipovni 28 ta ayblov, jumladan, qotillik, qotillikka urinish va xorijiy terrorchilik guruhini qo‘llab-quvvatlashda aybdor deb topdi, ammo Nyu-Yorkdagi qonunlarga ko‘ra u o‘limga hukm etilishi uchun jyurining barcha 12 a’zosi bunga qo‘shilishi talab etiladi — umumiy kelishuvga erishilmadi. Nyu-York shtatida oliy jazo 1953-yildan beri qo‘llanmagan.
Qonunga muvofiq o‘lim jazosi uzoq muddatli qamoq jazosiga almashtiriladi. Sudya shunday hukmni chiqarishga majbur va uni almashtira olmaydi. Hukmning yakuniy qismi keyinroq e’lon qilinadi.
Prokurorlar avvalroq gumondorni qatl etishga loyiq deb hisoblagan turli omillarni keltirgan edi. Soyipovning hujumi oldindan va puxta rejalangani, terrorchi tashkilotni qo‘llab-quvvatlash maqsadida amalga oshirilgani shular jumlasidandir.
Soyipov va uning jinoyati haqida
Sayfulla Soyipov 1988 yil 8 fevralda Toshkent shahrida tug‘ilgan. 2005 yilda kasb-hunar kollejini tamomlagan, 2005−2009-yillarda Toshkent moliya institutida ta’lim olgan. OTMni tamomlaganidan so‘ng poytaxtdagi “Sayohat” mehmonxonasida hisobchi bo‘lib ishlagan.
U Qo‘shma Shtatlarga 2010-yilda grin-karta orqali borgan. 2017-yil 31-oktabrida u kichik yuk mashinasini ijaraga oladi va velosipedlar harakatlanadigan yo‘lakka bostirib kiradi. Uning qurboniga aylangan sakkiz kishi orasida Argentinadan kelgan besh kishi va bir nafar Belgiya fuqarosi bo‘lgan, yana 12 kishi tan jarohati olgan. Soyipovni uning qorniga o‘q uzgan politsiyachi to‘xtatadi.
Soyipov ISHID nomidan harakatlanganini tan olgan va o‘zini ushbu guruh “askari” deb atagan. (U AQSHga ketguniga qadar jinoiy javobgarlikka tortilmagan va huquqni muhofaza qilish organlari e’tiboriga tushmagan).
Sayfullo Soyipov umrining qolgan qismini Kolorado shtatidagi maksimal darajada qat’iy rejimdagi ADX Florence federal qamoqxonasida o‘tkazadi. 2013-yil aprelida Boston marafonida portlashlar uyushtirishda ayblanib, o‘limga hukm qilingan Johar Sarnayev ham shu qamoqxonada saqlanmoqda.
Izoh (0)