Uill Smit nomi Gollivuddagi uzoq yillardan beri mashhur bo‘lib kelmoqda. U so‘nggi 10 yil ichida eng ko‘p daromad keltiruvchi aktyorlardan biri. U ishtirokidagi filmlar kassada 9 milliard dollardan ortiq foyda keltirgan. Smit kino va prodyuserlik faoliyati bilan birga musiqada — rep yo‘nalishida ham ijod qiladi.
Uill Smit to‘rt marta “Oskar” mukofotiga nomzod bo‘lgan. Qiziqarlisi, yuqori e’tirof etilgan filmlarning barchasi real voqealarga asoslangan.
“Ali” (2001)
Maykl Menning 2001-yilda namoyish etilgan “Ali” biografik sport dramasida Uill Smit birinchi marta tarixda iz qoldirgan shaxsni ekranda gavdalantirgan. Film afsonaviy bokschi va madaniyat arbobi Muhammad Alining hayotiga bag‘ishlangan. Film sportchi hayotidagi muhim yillariga bag‘ishlangan bo‘lib, unda Muhammad Alining qanday qilib sportda muvaffaqiyat qozonishi, mashhurlikka erishishi, Islomni qabul qilishi va Vyetnam urushidagi harbiy qo‘shinlarga qarshilik ko‘rsatishi haqida hikoya qiladi.
Aktyor dastlab bu rolga rozi bo‘lmagan, ammo sportchining o‘zi uni ko‘ndirgan. Aktyor ko‘p oylar davomida ringda mashq qildi, uning sa’y-harakatlari besamar ketmaydi — mazkur roli uchun u “Oskar” mukofotiga loyiq ko‘riladi. Uill Smit o‘z qahramonini chuqur o‘rganish va boks san’atini o‘zlashtirish uchun bir yil vaqt sarflagan.
Film reytingi: KP 7.5, IMDb 6.7
“Baxt ortidan quvib” (2006)
Film eng muvaffaqiyatli brokerlardan biriga aylangan va eng yirik investitsiya kompaniyasi asoschisi bo‘lgan yolg‘iz ota — Kris Gardner haqida. Loyiha 2006-yilda Kris Gardner va Kvinsi Troupning “Baxt ortidan quvib” nomli bestseller kitobiga asoslangan.
Qahramoni faoliyatining boshida pul bilan bog‘liq muammolarga duch keladi. Kris maosh to‘lanmaydigan olti oylik stajirovkadan o‘tadi, u yerda 19 ta raqobatchini mag‘lub etishi kerak bo‘ladi. Bosh qahramonning o‘g‘li obrazini aktyorning farzandi Jeyden o‘ynagan. Loyiha Smitga ikkinchi “Oskar” nominatsiyasini olib keldi, o‘g‘li esa MTV mukofotiga sazovor bo‘ldi va “Yil yutug‘i” deb topildi. Tanqidchilarning ijobiy baholaridan tashqari, film tijoriy muvaffaqiyatga erishdi va 55 million dollarlik byudjetga nisbatan 307,1 million dollar daromad keltirdi.
Film reytingi: KP 8.3, IMDb 8.0
“Himoyachi” (2015)
Piter Landesmanning “Himoyachi” filmida aktyor asli kelib chiqishi Nigeriyadan bo‘lgan amerikalik shifokor, patologik anatomiya va sud tibbiyoti eksperti, doktor Bennett Omalu rolini ijro etgan. Doktor futbol o‘yinchilarida bosh miyaning degenerativ kasalligi — surunkali travmatik ensefalopatiyani aniqlaydi.
Film real voqealarga asoslangan bo‘lib, NFL futbol o‘yinchilarining bosh jarohati natijasida yuzaga keladigan jiddiy miya shikastlanishi haqida xabardorlikni oshirishga qaratilgan sa’y-harakatlar haqida hikoya qiladi. Doktor Omaluning tadqiqotlari NFL bilan ziddiyatni keltirib chiqardi, ular shifokorning tadqiqotlari tarqalmasligini istaydi. Filmda shifokorning o‘z kasbiga sadoqati ajoyib tarzda tasvirlangan.
Film reytingi: KP 6.8, IMDb 7.1
“Qirol Richard” (2021)
Uill Smit mazkur biografik filmda tennischilar Venera va Serenaning otasi Richard Uilyams rolini o‘ynaydi. Bolaligidan u farzandlarini buyuk sportchilar bo‘lishlariga ishontirib o‘stirgan. Vaqt o‘tgach, qizlarining kattasi taniqli murabbiy Pol Koen e’tiboriga tushadi. Kichik qizi ortda qolmasligi uchun Richard barcha mashg‘ulotlarni yozib oladi va u bilan o‘zi shug‘ullanadi. Mazkur rol tufayli aktyor iste’dodining yangi qirralarini ochib beradi va buni tanqidchilar ham, tomoshabinlar ham ta’kidlashadi. Ushbu roli uchun aktyor 2022-yilda yana bir bor “Oskar”ga munosib ko‘riladi.
Film reytingi: KP 7.6, IMDb 7.5
“Ozodlik” (2022)
“Ozodlik” filmida Uill Smit murakkab dramatik rol o‘ynadi, bu ko‘plab tomoshabinlarni unga boshqa tomondan qarashga majbur qildi. U o‘tgan asrning shafqatsiz davrida juda aziyat chekkan, va nihoyat 1860-yillarda qochib ketgan qul obrazini yaratdi. Piter ismli qahramon qullar ovchisi Fassel (Ben Foster) dan qochish uchun botqoqlar va xavfli joylardan o‘tishi kerak bo‘ladi. Najot topish va oilasi bilan birlashish ilinjida u barcha to‘siqlarni yengadi.
Film reytingi: KP 6.6, IMDb 6.3
Izoh (0)