Jinoyat ishlari bo‘yicha Mirzo Ulug‘bek tuman sudida 2024-yilning iyul oyida Toshkent shahrining Yashnobod tumanida sodir etilgan mudhish qotillik voqeasi ko‘rib chiqilayotgani xabar berilgandi. Sudning 18-noyabr soat 16:00 da davom etgan navbatdagi majlisida qotillik sodir etilgan paytda voqea joyiga yetib borgan IIB xodimlari ko‘rsatma berdi. Bu haqda sudda qatnashgan “Daryo” jurnalisti xabar qildi.
“Joriy yilning 8-iyul kunidan 9-iyulga o‘tar kechasi tungi yo‘riqnomadan so‘ng, Yashnobod tumanidagi profilaktika inspektori Avaz Rasulov bilan birga 197-yo‘nalishga xizmatga jalb qilindik. Xizmat olib borayotgan vaqtimizda tungi soat 01:40 larda Yashnobod tumanidagi 1-sonli navbatchilik qismidan bizga xabar kelib tushdi. Xabarda ‘Olmos’ mahallasidagi yangi domlarda oilaviy katta janjal sodir bo‘lgani, zudlik bilan voqea joyiga yetib borishimiz kerakligi aytildi. Sherigim bilan o‘sha joyga taxminan 4-5 daqiqada yetib bordik. Borganimizda ko‘chada bir ayol kishi va besh-olti nafar fuqarolar bor ekan. Ayol bularning (sudlanuvchini ko‘rsatib) ayoli ekan. Uning yuzlarida, qo‘lida qon izlari bor edi. Holatni so‘raganimizda u zudlik bilan tepaga chiqishimiz kerakligini, o‘g‘li qonga belanib yotganini aytib, o‘zining ahvoli yaxshiligini bildirdi. Shundan so‘ng biz profilaktika inspektori bilan birgalikda 2-3 nafar xolis fuqarolar ishtirokida 2-qavatdagi xonadonga kirdik. Uyga kirganimizda chap qo‘lda, eshik oldida bola bosh qismi va yuz qismida juda katta tan jarohatlari bilan qonga belanib yotgan ekan”, deydi sudda guvohlik bergan IIB xodimi Alisher Najimov.
Qotillik sodir etilgan kuni Alisher Najimov bilan voqea joyiga yetib borgan profilaktika inspektori Avaz Rasulov janjal sodir bo‘lgan xonadonga borganida qonga belanib yotgan bola yonida pichoq ham yotganini esladi.
“O‘sha xonadonga kirib borgan paytimiz uyning kiraverish qismida qonga belangan pichoq yotgan edi. Undan narida chap qo‘lda esa yosh bola qonga belanib, qo‘rqinchli holatda ya’ni bosh va ko‘z qismi qonga belangan holatda yotgandi. Bu haqda tezkorlik bilan navbatchilik qismga, mas’ullarga axborot berdik. Bolaga birinchi yordam ko‘rsatish maqsadida uni choyshabga o‘rab, 4-sonli shahar klinik shifoxonaga olib ketayotganimizda onasi yugurib kelib, bolam deb yig‘ladi”, deydi voqeaga qo‘shimcha kiritgan profilaktika inspektori.
Alisher Najimovga ko‘ra, pichoqlangan bola shifoxonaga yetib borganida shifokorlar bola kech olib kelinganini aytib, uning vafot etganini ma’lum qilgan.
IIB xodimlarining guvohlik berishicha, ular bolani shifoxonaga olib ketgan paytda boshqa IIB xodimlari qotillikda gumonlangan 31 yoshli fuqaroni ham qo‘lga olgan.
Mazkur sudning aniqlashtirishicha, 2024-yilning 9-iyul kuni Yashnobod tumanidagi ko‘p qavatli uyda ijarada yashab kelayotgan 31 yoshli erkak qonuniy nikohdan o‘tmasdan yashab kelgan ayoli bilan nizolashib, uning birinchi turmushidan tug‘ilgan o‘g‘il farzandiga pichoq bilan tan jarohatlari yetkazib, hodisa joyidan yashiringan. Bola shifoxonaga yetmay vafot etgan.
Izoh (0)