Oliy Majlis Qonunchilik palatasining 18-noyabr kuni o‘tkazilgan yangi tarkibdagi birinchi majlisida Qonunchilik palatasi qo‘mitalari tuzilib, raislari saylandi.
Quyidagi 10 ta qo‘mita tuzildi:
- Agrar va suv xo‘jaligi masalalari qo‘mitasi;
- Budjet va iqtisodiy masalalar qo‘mitasi;
- Demokratik institutlar va fuqarolik jamiyatini rivojlantirish masalalari qo‘mitasi;
- Innovatsion rivojlanish va axborot texnologiyalari masalalari qo‘mitasi;
- Korrupsiyaga qarshi kurashish va sud-huquq masalalari qo‘mitasi;
- Mehnat, sog‘liqni saqlash va ijtimoiy masalalar qo‘mitasi;
- Tadbirkorlik, raqobatni rivojlantirish va sanoat masalalari qo‘mitasi;
- Fan, ta’lim, madaniyat, sport va yoshlar masalalari qo‘mitasi;
- Xalqaro ishlar, mudofaa va xavfsizlik masalalari qo‘mitasi;
- Ekologiya va atrof-muhitni muhofaza qilish masalalari qo‘mitasi.
Ravshan Mamutov Agrar va suv xo‘jaligi masalalari qo‘mitasi raisi etib, Sharofiddin Nazarov Budjet va iqtisodiy masalalar qo‘mitasi raisi etib, Gulrux Agzamova Demokratik institutlar va fuqarolik jamiyatini rivojlantirish masalalari qo‘mitasi raisi etib, Ilhom Abdullayev Innovatsion rivojlanish va axborot texnologiyalari masalalari qo‘mitasi raisi etib, Jahongir Shirinov Korrupsiyaga qarshi kurashish va sud-huquq masalalari qo‘mitasi raisi etib, Bobur Bekmurodov Tadbirkorlik, raqobatni rivojlantirish va sanoat masalalari qo‘mitasi raisi etib, Nodir Jumayev Fan, ta’lim, madaniyat, sport va yoshlar masalalari qo‘mitasi raisi etib, Ulug‘bek Shermatov Xalqaro ishlar, mudofaa va xavfsizlik masalalari qo‘mitasi raisi etib, Xayrullo G‘afforov Ekologiya va atrof-muhitni muhofaza qilish masalalari qo‘mitasi raisi etib saylandi.
Mehnat, sog‘liqni saqlash va ijtimoiy masalalar qo‘mitasi raisi lavozimi hozirda vakant qoldi.
Qonunchilik palatasi qo‘mitalari
Qo‘mitalar qonun loyihalarini tayyorlash ishini olib borish, Qonunchilik palatasi muhokamasiga kiritiladigan masalalarni dastlabki tarzda ko‘rib chiqish va tayyorlash, O‘zbekiston qonunlari hamda palata tomonidan qabul qilinadigan qarorlarning ijrosini nazorat qilish uchun Qonunchilik palatasining vakolatlari muddatiga Qonunchilik palatasi deputatlari orasidan rais, uning o‘rinbosari va a‘zolardan iborat tarkibda qo‘mitalar saylanadi.
Qo‘mitalar O‘zbekiston qonunlari va Qonunchilik palatasi qarorlarining ijro etilishi ustidan nazoratni amalga oshiradi.
Qo‘mita raisi qo‘mita ish rejasi loyihasi tayyorlanishini tashkil etadi va qo‘mitaning tasdiqlangan ish rejasi bajarilishi ustidan nazoratni amalga oshiradi. Zarur materiallar tayyorlanishini tashkil etadi, qo‘mita majlislarini chaqiradi va ularda raislik qiladi. Kiritilgan qonun loyihalarini ko‘rib chiqish bo‘yicha ishchi guruhlarining ishida qatnashish, shuningdek qo‘mitaning boshqa topshiriqlarini bajarish uchun qo‘mita a’zolarini belgilaydi va qonun hujjatlariga muvofiq boshqa vakolatlarni amalga oshiradi.
Izoh (0)