“Bryusselda Vengriyaning qonuniy hukumatini ag‘darish uchun fitna uyushtirilmoqda”, dedi bosh vazir Viktor Orban X ijtimoiy tarmog‘ida.
“Vengriyaga qarshi Manfred Veber va Ursula fon der Lyayen boshchiligida ochiqdan ochiq fitna uyushtirilmoqda. Maqsad — Vengriya hukumatini yangisiga almashtirish. Xuddi hozirgi Polsha hukumati kabi”, deb yozadi u.
Siyosatchi mamlakat rahbariyati bunga yo‘l qo‘ymasligini ta’kidladi.
Oktyabr oyi boshida Orban Yevrokomissiya va Yevropa xalq partiyasi rahbariyati Vengriya hukumatini ag‘darib, Bryusselning barcha talablarini bajaradigan o‘z yollanma askarlarini tayinlashni istashini aytdi. Uning ta’kidlashicha, bu Vengriya suveren siyosatining tugashini anglatadi.
Orbanning so‘zlariga ko‘ra, Budapesht Yevropa ittifoqining shantajlaridan qo‘rqmaydi va Yevropa ittifoqining qo‘g‘irchog‘iga aylanmaslik uchun kurashadi.
Bosh vazir, shuningdek, zamonaviy Yevropa ittifoqi Vengriyaga bosimi bilan SSSRning yomon parodiyasiga aylanganini ta’kidladi. Uning so‘zlariga ko‘ra, a’zo mamlakatlarga viloyat sifatida qaraydigan, qanday yashash kerakligini aytadigan “Bryusselga ehtiyoj yo‘q”. Siyosatchi taʼkidlaganidek, Yevropa ittifoqi rahbariyati Yevropa davlatlarining suverenitetini hurmat qilishi kerak.
Orbanning ta’kidlashicha, Bryussel “Vengriyaning xo‘jayini emas” va mamlakat umumyevropa qarorlarini muhokama qilishda o‘z nuqtayi nazarini himoya qilishda davom etadi. Unga ko‘ra, Budapesht YI talablariga qaramay, Ukrainaga qurol-yarog‘ yetkazib bermaydi va pul ajratmaydi, migrantlarni mamlakatga kiritmaydi va Vengriya maktablarida jinsiy ozchiliklar targ‘ibotini joriy qilmaydi.
Izoh (0)