Yevropa “har tomonlama” falokatga yaqinlashmoqda, chunki “urush psixozi”dan voz kechishga tayyor emas, dedi Vengriya tashqi ishlar va tashqi iqtisodiy aloqalar vaziri Peter Siyarto.
“Yevropa falokatga tobora yaqinlashmoqda — afsuski, har jihatdan. Hali ham bundan kattaroq ofatning oldini olish va minglab odamlarning hayotini saqlab qolish mumkin, ammo buning uchun harbiy psixozdan qutulish kerak. Lekin bu Yevropa ittifoqi tashqi ishlar vazirlarining Lyuksemburgdagi bugungi yig‘ilishida ro‘y berishini kutish qiyin”, — deb yozdi Siyarto ijtimoiy tarmoqda.
Ukrainada urush boshlangandan beri Vengriya doimiy ravishda Rossiyaning energiya manbalariga nisbatan sanksiyalar kiritilishiga va Ukrainaga qurol-yarog‘ yuborilishiga qarshi chiqqandi. 2022-yil mart oyida Vengriya parlamenti Ukrainaga mamlakat hududidan qurol-yarog‘ yetkazib berishni taqiqlovchi qaror qabul qilgan edi.
Vengriya Tashqi ishlar vazirligi rahbari Peter Siyartoning tushuntirishicha, Budapesht vengerlar yashaydigan Zakarpatiya hududini himoya qilishga intiladi, chunki bu hudud orqali qurol yetkazib berish Rossiya Federatsiyasi uchun o‘sha hududni qonuniy harbiy nishonga aylantirishi mumkin.
Mamlakat rahbariyati Vengriya tinchlik muzokaralarini tezroq boshlash tarafdori ekanini bir necha bor ta’kidlagan.
Izoh (0)