Ukraina xavfsizlik xizmati Rus pravoslav cherkovi rahbari patriarx Kirillni qidiruvga berdi. Bu haqdagi ma’lumotlar 15-dekabr kuni Ukraina Ichki ishlar vazirligining bazasida paydo bo‘ldi.
Patriarx Kirill — Ukraina Ichki ishlar vazirligining kartasida fuqarolik nomi Gundyayev Vladimir Mixaylovich deb yozilgan — ikkita moddada ayblanmoqda. Gap Ukraina Jinoyat kodeksining 110-moddasi 3-qismi: Ukrainaning hududiy yaxlitligi va daxlsizligiga tajovuz qilish”, shuningdek, 437-moddasining 2-qismi: “Agressiv urush olib borish” haqida bormoqda. Ikkala modda uchun jazo 30 yilgacha qamoqni tashkil etishi mumkin.
Ukrainaning patriarx Kirillni milliy qidiruvga e’lon qilishi tegishli so‘rovni xalqaro qidiruv organlariga topshirishdan oldin amalga oshirildi.
Avvalroq UXX patriarx Kirillni Rossiya agressiyasini oqlaganlikda gumon qilgandi
2023-yil noyabr oyining boshida UXX Gundyayev Ukraina Jinoyat kodeksining uchta moddasi bo‘yicha gumon qilinayotganini e’lon qildi: mamlakat hududiy yaxlitligiga tajovuz qilish, agressiv urush olib borish, shuningdek, 2022-yilda Ukraina Jinoyat kodeksiga kiritilgan alohida modda — Rossiyaning Ukrainaga qarshi qurolli tajovuzini oqlash va uning ishtirokchilarini maqtash.
Patriarx qidiruvga berilganda oxirgi modda ko‘rsatilmagan.
UXX ta’kidlaganidek, patriarx Kirill video va’zlardan, rasmiy Rossiya ommaviy axborot vositalariga sharhlardan, Patriarxiya veb-saytidagi nashrlardan, shuningdek, Ukrainada Rossiyadagi diniy jamoalar va Moskva patriarxati vakillaridan foydalangan holda Rossiya rasmiylarining pozitsiyasini targ‘ib qilmoqda. Xususan, 2022-yil mart oyida Kirill Rossiya gvardiyasi boshlig‘i Viktor Zolotovni olqishlagan, 2023-yil fevral oyi oxirida Ukraina sharqining ishg‘ol qilinishini oqlagan.
Patriarx Kirill urushni qo‘llab-quvvatlagan
Rossiyaning Ukrainaga qarshi keng ko‘lamli urushini ochiq qo‘llab-quvvatlagan, davlat rahbarining birinchi yaqin sheriklaridan biri bo‘lgan patriarx Kirillning bayonotlari boshqa mamlakatlardagi cherkovlar vakillari tomonidan bir necha bor tanqid qilingan.
Rossiyaning Ukrainaga qarshi urushini ma’qullagani uchun patriarx Kirill Buyuk Britaniya va Kanadaning sanksiyalar ro‘yxatiga kiritilgan. Yevropa Ittifoqi ham uni sanksiyalar ro‘yxatiga kiritish niyatida edi, biroq Vengriya bosh vaziri Viktor Orban bunga to‘sqinlik qildi.
Izoh (0)