Germaniya va AQSHdan tashqari Vengriya, Slovakiya, Belgiya, Sloveniya va Ispaniya Ukrainani NATOga taklif qilishga qarshi. Bu haqda tegishli manbalarga tayanib Politico xabar berdi.
Nashrga ko‘ra, alyansning asosiy aʼzolari “Rossiya bilan urushga tortilish ehtimolidan xavotirda”.
“Belgiya, Sloveniya yoki Ispaniya kabi davlatlar AQSH va Germaniya ortiga yashiringan. Ular Ukrainaning NATOga kirishini xohlamaydi”, deydi NATO rasmiylaridan biri.
Alyansning yana bir nomi oshkor etilmagan vakilining fikricha, bu davlatlar Ukrainani NATOga taklif qilishni “abstrakt tarzda qo‘llab-quvvatlamoqda”, biroq “u amalga oshirilgach, ular bu g‘oyaga ochiqchasiga qarshi chiqadi”.
Politicoʼning aniqlik kiritishicha, Vengriya va Slovakiya bosh vazirlari Viktor Orban va Robert Fitso turli maqsadlarda yo‘l tutadi va “umuman Kremlparast pozitsiyani egallaydi”. Nashr suhbatdoshlarining qo‘shimcha qilishicha, Qo‘shma Shtatlar va Germaniya kelajakda, harbiy harakatlar tugaganidan keyin Ukrainaning kirib kelishini istisno etmaydi.
16-oktyabr kuni Ukraina prezidenti Vladimir Zelenskiy Oliy Radaga g‘alaba rejasini taqdim etgan edi. Ushbu reja besh banddan iborat. Rejaning birinchi bandi Ukrainani harbiy mojaro tugaguniga qadar NATOga a’zo bo‘lishini nazarda tutadi. Shuningdek, u uchta maxfiy qoidani o‘z ichiga oladi.
Avvalroq Le Monde nashri AQSH Ukrainaning NATOga a’zo bo‘lishiga endi fundamental e’tirozi yo‘qligini va Demokratik partiyadan nomzod Kamala Harris AQSH prezidentlik saylovlarida g‘alaba qozonsa, Jo Bayden uni ittifoqqa taklif qilishi mumkinligi haqida xabar bergan edi.
Izoh (0)