Chexiya parlamenti deputati Danushe Nerudova va litvalik deputat Pyatras Aushtryavichyus Yevropa komissiyasiga maktub yo‘lladi. Unda Vengriyaning rossiyaliklar uchun viza rejimini yumshatish haqidagi yaqinda qabul qilgan qarori munosabati bilan choralar ko‘rish talab qilingan.
Yevroparlament deputatlari bu Shengen zonasi faoliyatini xavf ostiga qo‘yadi, deb hisoblaydi. Ular Yevropa Ittifoqini Vengriyani Shengendan chiqarib tashlashga chaqirishdi.
“Agar Vengriya hukumati o‘z siyosatini o‘zgartirishdan bosh tortsa, Komissiya va Yevropa Ittifoqining barcha vakillari Yevropa fuqarolarini himoya qilish bo‘yicha yangi choralar, jumladan, zarurat tug‘ilganda Vengriya chegaralarida yangi nazorat punktlari o‘rnatish yo‘li bilan Shengen hududida Vengriyaning mavjudligiga eʼtiroz bildirishi kerak”, deyiladi maktubda.
Xatda, shuningdek, Yevropa Ittifoqi davlatlari Vengriya vizalarini tan olmasligi mumkinligi aytiladi. Politico xabariga ko‘ra, maktubni 70 ga yaqin deputatlar, jumladan, Belgiya va Irlandiyaning sobiq bosh vazirlari imzolagan. Nashr maktubga imzo chekkanlarning ismini keltirmagan.
Iyul oyi oxirida Vengriya Rossiya va Belarus fuqarolarini mamlakatda ishlashni xohlovchilarga beriladigan milliy karta dasturiga kiritdi. Shundan so‘ng Yevroparlamentdagi eng yirik Yevropa xalq partiyasi rahbari Manfred Veber Vengriya viza cheklovlarini bekor qilish orqali “rus josuslari”ga yangi yo‘laklar yaratishi mumkinligini aytib o‘tdi.
Izoh (0)