Yevropa Ittifoqi davlatlari Rossiyaga qarshi yangi sanksiyalar bo‘yicha kelisha olmayapti — Politico

Yevropa Ittifoqi mamlakatlari vakillari yangi sanksiyalar paketi bo‘yicha kelisha olmadi, deya ma’lum qildi Politico manbalari.

Nashrning yozishicha, Yevrokomissiya yig‘ilish oldidan cheklovlarning boshqa versiyasini taqdim etgan, biroq bu kelishuvga olib kelmagan. Yevropa Ittifoqi elchilari 14-iyun kuni yana uchrashadi.

Diplomatlardan biri Politico nashriga elchilar kelishuvga “yaqinlashib borayotganini” aytdi. Nashrning yozishicha, Gretsiya va Vengriya paketni bloklashda davom etmoqda. Ular Ukrainadan o‘z kompaniyalarini “urush homiylari” ro‘yxatidan olib tashlashni talab qilmoqdalar. Bundan tashqari, bir qancha davlatlar, jumladan, Germaniya va Fransiya Rossiya sanksiyalarini chetlab o‘tishning oldini olish choralari boshqa davlatlar bilan diplomatik aloqalarga zarar yetkazishi mumkinligidan xavotirda.

Yevropa Ittifoqi sanksiyalarining 10-paketi fevral oyida joriy qilingan edi. O‘shandan beri yangi chora-tadbirlar muhokama qilindi. Yevrokomissiya rahbari Ursula fon der Lyayenning so‘zlariga ko‘ra, sanksiya rejimini buzgan dunyo bo‘ylab 90 dan ortiq kompaniyalarga nisbatan cheklovlar joriy etiladi.