Yevropa Ittifoqi kengashi Ukrainaga ushbu mamlakatni qo‘llab-quvvatlash fondidan taxminan 4,2 milliard yevro ajratish bo‘yicha avval kelishilgan qarorni ma’qulladi.
Bu haqda Yevropa Ittifoqi kengashiga raislik qiluvchi Vengriya mas’ullari ma’lum qildi.
“Yozma protsedurani yakunlab, bugun kengash Ukrainani qo‘llab-quvvatlash jamg‘armasi doirasida taxminan 4,2 milliard yevro miqdoridagi birinchi to‘lovni amalga oshirishga qaror qildi”, deyiladi bayonotda.
30-iyul kuni AQSH hukumati Ukraina uchun 1,7 milliard dollarlik yangi yordam paketini maʼqullagani xabar berilgandi.
Harbiy yordam Ukraina xavfsizligiga ko‘maklashish tashabbusi doirasidagi uzoq muddatli shartnomalar uchun 1,5 milliard dollar va Pentagon zaxiralaridan olingan 200 million dollarni o‘z ichiga oladi.
AQSHning so‘nggi harbiy paketi havo mudofaasi qurilmalari, raketalar, artilleriya va tankka qarshi qurollarni o‘z ichiga olgan. Pentagon keyingi yordam paketlarida Ukrainaga Patriot majmualarini berishni ham qayta yo‘lga qo‘yishni rejalashtirgan.
Izoh (0)