Chexiyadagi suv toshqinlari tufayli 21 ming kishi evakuatsiya qilindi (foto)

Chexiyada suv toshqini tufayli 21 mingdan ortiq aholi evakuatsiya qilindi. Bu haqda Chexiya Ichki ishlar vazirligi rahbari Vit Rakushan xabar berdi.

So‘nggi maʼlumotlarga ko‘ra, toshqinlarda besh kishi halok bo‘lgan, yana sakkiz nafar fuqaro bedarak yo‘qolganlar ro‘yxatida.

“Armiya vertolyotlari hududga 59,4 tonna gumanitar yordam yetkazdi. Hammasi bo‘lib 21 488 kishi evakuatsiya qilindi, 1 516 kishi qutqarildi”, dedi Rakushan inqiroz shtab-kvartirasi yig‘ilishidan so‘ng.

Mamlakatda toshqindan zarar ko‘rgan infratuzilmani tiklash ishlari davom etmoqda.

13 —18-sentyabr kunlari Chexiyaning deyarli butun hududida uzoq muddatli yog‘ingarchilik kuzatildi. Noqulay ob-havo tufayli 260 mingga yaqin uy elektr taʼminotisiz qolgan, avtomobil va temiryo‘l uchastkalari shikastlangan.

Chexiya prezidenti Petr Pavelning so‘zlariga ko‘ra, toshqindan zarar ko‘rgan hududlarni tiklash oylar yoki yillar davom etishi mumkin. Kuchli shamol va kuchli yomg‘ir Avstriya, Vengriya, Ruminiya va Slovakiyada ham sodir bo‘lgan.